आगमी मंसिर ४ गते हुने प्रतिनिधि सभा तथा प्रदेश सभा सदस्य निर्वाचनमा आचारसंहिता उल्लंघन गरेको उजुरी परेपछि निर्वाचन आयोगले प्रचण्डसहित ६ जना र आठ संस्थालाई स्पष्टीकरण सोधेको छ ।
आयोगका सहायक प्रवक्ता कमल भट्टराईका अनुसार लागि निर्वाचन आयोगबाट लागु गरिएको निर्वाचन आचारसंहिता, २०७९ उल्लंघनका सम्बन्धमा आयोगमा परेका उजुरी तथा प्राप्त जानकारी विषयमा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड , जनमत पार्टीका अध्यक्ष डा. चन्द्रकान्त (सीके) राउत, बाराको पचरौता नगरपालिकाका प्रमुख जलन्धर सिंह जैसवार, हाम्रो नेपाल पार्टीका अध्यक्ष अनन्तराज घिमिरे, नुवाकोट प्रतिनिधि सभा सदस्य निर्वाचन क्षेत्र नं १ का नेकपा (एमाले)का उम्मेदवार बद्री मैनाली र व्यापार तथा निकासी प्रवर्द्धन केन्द्रका सातौँ तहका अधिकृत गोकुल वस्तीलाई आयोगले स्पष्टीकरण सोधेको हो ।
यसैगरी श्रम रोजगार तथा सामाजिक सुरक्षा मन्त्रालय र संघीय मामिला तथा सामान्य प्रशासन मन्त्रालय, शहरी विकास मन्त्रालय, नेपाल प्रज्ञा प्रतिष्ठान, अर्थ मन्त्रालय, धितोपत्र बोर्ड, बीमा समिति र मुख्यमन्त्री तथा मन्त्रिपरिषद्को कार्यालय, गण्डकी प्रदेशलाई आयोगको सहमति बमोजिम मात्र कार्यसम्पादन गर्न स्पष्टीकरण सोधिएको सोधिएको सहायक प्रवक्ता भट्टराईले जानकारी दिए ।
गोरखामा उम्मेदवारी मनोनयन गर्ने क्रममा बाजा बजाएको विषयलाई लिएर माओवादी अध्यक्ष प्रचण्डलाई स्पष्टीकरण सोधिएको बुझिएको छ । उम्मेदवारी दर्ताको क्रममा आयोगले बाजा किन बजाएको भनेर स्पष्टीकरण सोधेपछि त्यसको जवाफ फर्काएको शनिवार गोरखामा आयोजित एक कार्यक्रमलाई सम्बोधन गर्दै जानकारी गराएका हुन्।
आयोगलाई स्पष्टीकरण बुझाएकोबारे उनले भने, ‘अस्ति कसले बाजा बजाएछ। तर, बाजा कहाँबाट आयो मलाई थाहा छैन। निर्वाचन आयोगले स्पष्टीकरण सोधेको थियो। मेरो योजनामा होइन भनेर लिखित स्पष्टीकरण दिएर आएँ।’
