आगामी मंसिर ४ गते हुन गइरहेको प्रतिनिधि सभा र प्रदेशसभा सदस्यको प्रत्यक्षतर्फको निर्वाचनमा २३२ जना वृद्धभत्ता खाने उम्मेदवारहरूले रहेका छन् ।
सरकारले ६८ वर्ष पुगेका नागरिकहरूलाई वृद्धभत्ता उपलव्ध गराउँदै आएको छ । असोज २३ गते १६५ निर्वाचन क्षेत्र मा उम्मेदवारी परेका दुई हजार ५३१ मध्येमा १२६ जना र ३३० प्रदेशसभा निर्वाचन क्षेत्रमा उम्मेदवारी परेका तीन हजार ४८१ उम्मेदवारमध्येमा १०६ जना उम्मेदवारहरूको उमेर वृद्धभत्ता खाने भएको छ ।
प्रतिनिधि सभा निर्वाचनमा सबैभन्दा जेयष्ठ नारिकको रुपमा ९९ वर्षीय वृद्धाले उम्मेदवारी दिएका छन् । माओवादी केन्द्रका अध्यक्ष प्रचण्डको निर्वाचन क्षेत्र गोरखा क्षेत्र नम्बर २ बाट ९९ वर्षीय टिका दत्त पोखरेलले नेपाली कांग्रेस (बी.पी.) बाट उम्मेदवारी दर्ता गरेका हुन् ।
यसरी उम्मेदवारी दिनेमा पुरुषहरूकै बाहुल्यता छ । प्रतिनिधी सभामा उम्मेदवारी दिएका मध्ये तीन जना महिला हुन् भने बाँकी १२३ जना पुरुष हुन् । झापाको क्षेत्र नम्बर १ मा जनता समाजवादी पार्टी, नेपालबाट उम्मेद्वारी दिएकी राधा थापाको उमेर ७० वर्ष हो भने मोरङ क्षेत्र नम्बर २ मा नेपाली कांग्रेसकी उम्मेदवार सुजाता कोइराला र पर्सा-१ मा स्वतन्त्र उम्मेदवारी दिएकी शान्ती देवी खड्काको उमेर ६८ वर्ष छ ।
त्यस्तैगरी प्रदेशमा उम्मेदवारी दिएका ६८ वर्ष माथिका १०६ उम्मेदवार मध्येमा दुई जना मात्र महिला हुन् । काठमाडौं क्षेत्र नम्बर ३ (ख) मा स्वतन्त्र उम्मेदवारी दिएकी विष्णु देवी पुडासैनी र काठमाडौं क्षेत्र नम्बर ७ (क) मा राष्ट्रिय प्रजातन्त्र पार्टी, नेपाल बाट उम्मेदवारी दिएकी रत्ना कुमारी श्रेष्ठ प्रधानको उमेर ७१ वर्ष भएको निर्वाचन आयोगले सार्वजनिक गरेको विवरणले देखाउँछ ।
प्रदेसभामा उम्मेदवारी दिएका ६८ वर्ष माथिका उम्मेदवारहरूको विवरण
वृद्धभत्ता खाने उमेरका ४० जनाले प्रतिनिधिसभा निर्वाचनमा स्वतन्त्र उम्मेदवारी दिँदा २७ जना प्रदेशसभामा उम्मेदवारी दर्ता गरेका छन् । निर्वाचन आयोगले मंगलबार साँझ प्रतिनिधि सभा र प्रदेशसभामा उम्मेदवारी दिएकाहरूको नामावली सार्वजनिक गरेको हो ।
प्रतिनिधिमा सभामा नेपाली कांग्रेसका १४, राष्ट्रिय प्रजातन्त्र पार्टीका १३, एमाले र लोसपाका समान ६/६, राप्रपा नेपालका ५ जना, जसपा, मंगोजल नेशनल अर्गनाइजेसन र नेपाली कांग्रेस (बी.पी.) का समान ४/४ जना, जनमत पार्टी, नेकपा (एकिकृत समाजबादी) नेकपा (माक्सवादी लेनिनवादी) र राष्ट्रिय जनमुक्ति पार्टीका समान ३/३ जना, नेकपा (माओवादी केन्द्र) (एकल चुनाव चिह्न), नेपाल मजदुर किसान पार्टी, नेपाल लोकतान्त्रिक पार्टी र संघीय लोकतान्त्रिक राष्टिय मञ्चबाट समान २/२ जना, जनसमाजवादी पार्टी नेपाल, तराइ-मधेश लोकतान्त्रिक पार्टी, नागरिक उन्मुक्ति पार्टी, नेपाल कम्युनिष्ट पार्टी मार्क्सवादी (पुष्पलाल), नेपाल संघीय समाजवादी पार्टी, नेपाल सद्भावना पार्टी, नेपाल सुशासन पार्टी(एकल चुनाव चिन्ह), नेश्नलिष्ट पिपल्स पार्टी, राष्ट्रिय जनमोर्चा र हाम्रो नेपाली पार्टी बाट १/१ जना उम्मेदवारहरूको ६८ वर्ष भन्दा माथिका छन् ।
प्रतिनिधिसभामा उम्मेदवारी दिएका ६८ वर्ष माथिका उम्मेदवारहरूको विवरण
