राष्ट्रिय क्रिकेट टिमको कप्तानबाट निलम्बनमा परेका सन्दीप लामिछानेलाई जबरजस्ती करणीमा अदालत उपस्थित गराउँदा सञ्चारकर्मीको नजरबाट लुकाइएको छ ।
असोज २० गते त्रिभुवन अन्तराष्ट्रिय विमानस्थलमा कतार एयरवेजको विमानबाट काठमाडौं अवतरण गरेलगत्तै पक्राउ परेका सन्दीप लामिछानेलाई म्याद थप गर्न आज काठमाडौं जिल्ला अदालतमा उपस्थित गराइएको थियो ।
प्रहरीले सन्दीपलाई ग्राउन्ड फ्लोरबाट लिफ्टमा राखेर माथि लगेको र त्यहाँ काम सकिएपछि फेरी लिफ्टबाट ग्राउन्ड फ्लोरमा लगेर भ्यानमा राख्दै प्रहरी वृत्त गौशाला लगेको हो । जबरजस्ती करणीको आरोप लागेका तात्कालिन सभामुख महरालाई भने प्रहरीले अगाडिको गेटबाट नै अदालत उपस्थित गराएको थियो त्यस्तै मनोज पाण्डेलाई पनि अदालतमा उपस्थित गराउँदा सञ्चारकर्मीहरूबाट लुकाइएको थिएन ।
प्रहरीले अदालतसमक्ष १० दिनको लागि म्याद थप गर्न माग गरेतापनि अदालतले सात दिनको आदेश दिएको छ । २० गते पक्राउ परेका लामिछानेलाई अब २७ गते पुन: अदालत उपस्थित गराइनेछ । फौजदारी मुद्दामा प्रहरी एकपटक वा पटकपटक गरी बढीमा २४ दिनसम्म हिरासतमा राखेर अनुसन्धान गर्न पाउने कानुनी व्यवस्था छ ।
भदौ ५ गते एक नाबालिकालाई पटकपटक जबरजस्ती करणी गरेको भन्दै ती नाबालिकाले भदौ २१ गते प्रहरी वृत गौशालामा उजुरी दिएकी थिइन् । उनको उजुरीपछि प्रहरीले सन्दीपविरुद्ध पक्राउ पूर्जी जारी गरेको थियो । पक्राउ पूर्जी जारी हुँदा उनी पूर्व निर्धारित कार्यक्रमअनुसार क्यारेबियन प्रिमियर लिग खेल्न वेस्टइन्डिज पुगेका थिए ।
जिल्ला अदालतले उनीविरुद्ध पक्राउ पुर्जी जारी गरेपछि गत भदौ २३ गते नै क्यानको कार्य सम्पादन समितिको निर्णय भन्दै उनलाई राष्ट्रिय क्रिकेट टोलीबाट निलम्बन गरेको थियो। त्यसपछी लगत्तै नेपाल आउने बताएका सन्दीप करिव एक महिना सम्पर्कबिहीन भएर बसेका थिए । नेपाल प्रहरीले इन्टरपोलमार्फत सन्दीपलाई नेपाल झिकाउने तयारी गरिरहँदा उनी दसैँको भोलिपल्ट नेपाल आइपुगेका हुन् ।
अब प्रहरीले सन्दीपविरुद्ध परेको उजुरीमा प्रतिवेदन बनाएर सरकारी वकीलसमक्ष प्रतिवेदन बुझाउँछ त्यसपछि मात्र अदालतमा बहस सुरु हुन्छ ।
