झापाको क्षेत्र नम्बर १ मा एमालेबाट सर्वसम्मत सिफारिस भएका रविन कोइरालाको स्थानमा अग्नि खरेलको इन्ट्रि भएको छ ।
भदौको दोस्रो साता नेपाल कम्युनिस्ट पार्टी (एमाले) ले झापा क्षेत्र नं १ बाट रविन कोइरालालाई संघीय सांसदको उम्मेदवारको रुपमा सर्वसम्मत सिफारिस गरेको थियो अहिले आएर उक्त स्थानको टिकट एमालेले अग्नि खरेललाई दिने भएको हो ।
स्थायी कमिटी सदस्य अग्नि खरेल र देवराज घिमिरे दुबैलाई टिकट दिन पार्टी अध्यक्ष केपी शर्मा ओलीले कोइरालालाई प्रदेशमा चुनाव लड्न प्रस्ताव गरेका थिए । देवराज २ र अग्नि १ बाट प्रतिनिधिसभा सदस्यको उम्मेदवार हुनेछन् । कोइरालालाई झापा १ को कुनै एक क्षेत्रबाट उम्मेदवार बन्न भनिएको छ ।
सर्वसम्मत भएका कोइरालाई भने पार्टीले प्रदेशमा टिकट दिने र प्रदेश १ को मुख्यमन्त्री समेत बनाउने आश्वासन दिएको बताइएको छ ।
तर कोइरालाले प्रदेशसभा सदस्यमा उम्मेदवारी दिन अस्वीकार गरेका छन् । पूर्व सांसद समेत रहेका कोइरालाले भने आफूले प्रतिनिधिसभा सदस्यका लागि तयारी गरिरहेकाले प्रदेशमा नउठ्ने जवाफ फर्काएका छन् । कोइरालाले भने, ‘मैले आधिकारिक ठाउँमा प्रदेशमा उठ्दिन भनिसकेको छु ।’
कोइराला पहिले माधव झलनाथ नजिक थिए । नेकपा एमाले झापाका पूर्व अध्यक्ष रविन कोइरालाले २०७८ सालको भदौ दोस्रो साता आफू माधव नेपालको पार्टीमा नरहेको स्पष्ट पारेका थिए ।
मेचीनगर नगरपालिकाका पूर्व मेयर कोइराला २०५४ सालको विभाजनमा नेकपा मालेतिर लागेका थिए । कोइरालाले २०७० सालको संविधानसभाको निर्वाचनमा झापा १ बाट काँग्रेसका प्रवक्ता विश्वप्रकाश शर्मालाई चुनाव हराएका थिए ।
सत्ता गठबन्धनबाट उक्त क्षेत्रमा नेपाली कांग्रेसका महामन्त्री विश्वप्रकाश शर्मा उठ्ने भएका छन् । स्थानीय तहमा वडाध्यक्षको मत हेर्दा जसले राप्रपाको साथ लिन्छ उक्त पार्टीले नै चुनावमा बढी मत ल्याउने देखिन्छ ।
वरिष्ठ अधिवक्ता समेत रहेका खरेल झापाको गौरादह निवासी हुन्। उनी २०७२ सालमा केपी शर्मा ओलीको सरकार हुँदा मन्त्री र सरकारको प्रवक्ता भएका थिए भने २०७४ सालमा महान्यायाधिवक्तामा नियुक्त भएका थिए । खरेल २०६४ र २०७० को संविधानसभा सदस्य रहेका थिए।
राप्रपाको साथ लिनेलाई विजयी हुन सहज
झापाको क्षेत्र नम्बर १ मा मेचीनगर नगरपालिकाका १५ वटै वडा, भद्रपुर नगरपालिकाको ९ र १०, बुद्धशान्ति गाउँपालिकाको ४,५,६,७ वडा गरी कूल २१ वडा रहेका छन् ।
वैशाख ३० गते सम्पन्न भएको स्थानीय तह सदस्य निर्वाचनमा वडाध्यक्षले पाएको मत सङ्ख्या हेर्दा त्यहाँ राप्रपाको साथ लिने राजनैतिक दलका उम्मेदवारले जित निकाल्न सहज हुने देखिन्छ । वडाध्यक्षमा एमालेले ३१,२३२ मत पाएको छ जुन सत्ता गठबन्धनमा आबद्ध दलहरूका उम्मेदवारले पाएको जोडफल भन्दा १,९४७ ले बढी हो ।
त्यहाँ नेपाली कांग्रेसले २४,०५९, माओवादी केन्द्रले ३,९०५, एकीकृत समाजवादीले १,२५२ र जसपाले ६९ मत पाएका छन् । राष्ट्रिय जनमोर्चाबाट उक्त निर्वाचन क्षेत्रको कुनै पनि वडामा उम्मेदवारी परेको थिएन । गठबन्धनबाट वडाध्यक्षमा उठेका उम्मेदवारहरूले पाएको कूल मतको योगफल २९,२८५ हुन्छ ।
