नेकपा एमालेका नेता विशाल भट्टराईले सरकारी गाडी फिर्ता गरेका छन् । संसदको कार्यकाल सकिएसँगै भट्टराईले प्रमुख सचेतकको हैसियतमा संसद सचिवालयबाट पाएको गाडी फिर्ता गरेका हुन् ।
भट्टराईले फेसबुकमार्फत संसद सचिवालयले उपलव्ध गराएको गाडी फिर्ता गरेको जानकारी दिएका हुन् । भट्टराई २०७७ फाल्गुन १४ गते तत्कालीन नेकपाको मुख्य सचेतक बनेका थिए । ०७४ सालमा निर्वाचित प्रतिनिधिसभा सदस्यको कार्यकाल असोज १ गतेबाट सकिएको हो ।
‘जिल्लामा भएकोले मैले प्राप्त गरेको गाडी लगायतका सामग्री संसद सचिवालयमा बुझाउन अलिक बिलम्व हुन गयो । पदमुक्त भएपछि सामग्री बुझाउन केही दिन समय पाइन्छ भनेर पनि ढिला भएको हो । यसबीचमा गाडी बुझाएनन् भनेर ध्यानाकर्षण गराउनु हुने सञ्चारमाध्यमलगायतलाइ धन्यवाद दिन चाहान्छु ।
उनले लेखेका छन्, ‘राज्यकै सम्पत्ति त हो भनेर कतिपय मानिसहरु बेपरवाह गरेको देखिएको छ । तर आफ्नो नीजि साधन जत्तिकै ठानेर हामीले यो गाडीको सुरक्षा गर्यौं र हामीले प्राप्त गरेको भन्दा किन्चित क्षति हुन नदिइ जस्ताको तस्तै बुझाएका छौं ।’
बक्यौता केही छैन : संसद सचिवालय
संघीय संसद सचिवालय अन्तरगतको सांसद सुविधा व्यवस्थापन शाखाले विशाल भट्टराईको नाममा कुनै प्रकारको नगदी जिन्सी बुझाउन बाँकी, बक्यौता नरहेको जनाएको छ ।
शाखा अधिकृत लक्ष्मीप्रसाद ओझाले भट्टराईको नाममा कुनै पनि बक्यौता नरहेको प्रमाणित गरिएको एक पत्र दिएका छन् । उक्त पत्रका लेखिउको छ । ‘संघीय संसद, प्रतिनिधि सभा (२०७४) मा खोटाङ जिल्ला, क्षेत्र नं. १ बाट प्रतिनिधित्व गर्नुहुने माननीय सदस्य श्री विशाल भट्टराईको नाममा यस सचिवालयमा कुनै प्रकारको नगदी जिन्सी बुझाउन बाँकी, बक्यौता नरहेको व्यहोरा अभिलेख अनुसार प्रमाणित गरिन्छ।’