दुई पाङ्ग्रे सवारीसाधनको अघिल्तिर राखिएका मोबाइल स्टयाण्ड हटाउन ट्राफिक प्रहरीले अभियान चलाएको छ ।
पछिल्लो समय नेपालमा सञ्चालनमा आएका पठाओ, टुटल, इनड्राइभर जस्ता राइड शेयरिङ कम्पनीमा आबद्ध चालकहरू मात्र हैन आम मानिसहरूले पनि दुई पाङ्ग्रे सवारीसाधनमा मोबाइल स्टयाण्ड राख्ने गरेका थिए ।
नेपाल सरकारको प्रचलित कानुन बमोजिम निर्माण भैसकेको बाइकमा केही कुरा थप्नु वा हटाउनु बाइकको स्वरूप परिवर्तन (मोडिफिकेसन) हो । सोही कारण बाइकमा राखिएका मोबाइल स्ट्यान्ड हटाउन भनी केही दिन अगाडि काठमाडौँ उपत्यका ट्राफिक प्रहरी कार्यालयबाट पठाओ नेपाल लगायतलाई पत्र काटिएको थियो ।
ट्राफिक प्रहरी प्रवक्ता एसएसपी राजेन्द्र प्रसाद भट्टका अनुसार बाइकको ह्यान्डलमा राखिएका यस्ता मोबाइलले चालकहरूको ध्यान सडकमा भन्दा मोबाइलमा पुग्ने र यसले दुर्घटना बढाउने सम्भावना भएकाले हटाउन थालिएको हो । उनले केटिएम दैनिकसँग भने “अगाडि मोबाइल राख्ने अनि बाइक चलाउने भएपछि डिस्ट्रयाक्सन हुन्छ र यसले दुर्घटना बढाउँछ ।”
उनले थपे, “कम्पनीबाट बनेर आएको बाहेक सवारी साधनमा कुनै पनि कुराहरू थपघट गर्न पाइँदैन । यसले दुर्घटना पनि बढाउने भएकाले हटाउन थालिएको हो ।”
पठाओ नेपालका प्रबन्ध निर्देशक असिमान सिंह बस्नेत भने पठाओ मा आबद्ध भएका राइडर र फुड म्यानहरूलाई गत सोमबारदेखि नै हटाउन जानकारी गराएको बताए । उनले भने, “ट्राफिकको पत्र पाएपछि हामीले उक्त सूचना हाम्रा राइडर र फुड म्यान साथीहरूलाई गत सोमबारदेखि जानकारी गराएका छौँ ।’
कतिपय राइडर र फुड म्यानहरूले मोबाइल स्ट्यान्ड नहुँदा गुगल म्याप प्रयोग गर्नमा कठिनाइ भएको भनी गुनासोहरू गरिरहेका बस्नेतले बताए । उनले भने, “हामी हाम्रा अग्र भागमा खटिएर काम गर्ने साथीहरूको सुझाव र गुनासोलाई सम्बन्धित निकायमा पहल कदमी गर्ने प्रतिबद्धता व्यक्त गर्दछौँ ।”
ट्राफिक प्रहरीले विभिन्न जिल्लामा मोडिफाइड गरेर ध्वनि प्रदूषण हुने गरी बजारमा ठुलो आवाजले बाइक चलाउने, स्वरूप परिवर्तन गरी चलाउने, लापरबाही ढङ्गले बाइक तथा अन्य सवारी साधन चलाउनेलाई पनि कारबाही गरिरहेको छ ।
सवारी तथा यातायात व्यवस्था ऐन २०४९ को दफा ३९ मा स्वीकृति नलिई हेरफेर गर्न नहुने उल्लेख छ । तर निर्माता कम्पनीले सवारीको बनोट सम्बन्धमा निर्धारण गरेको विस्तृत विवरण (स्पेसिफिकेशन) मा परिवर्तन गर्ने गरी स्वीकृति नदिइने पनि सोही दफामा उल्लेख गरिएको छ ।
