नेपाली कांग्रेसका सभापति शेरबहादुर देउवाले एकलौटी गरेको भन्दै सभापतिका प्रत्यासी शेखर कोइराला समूहले असन्तुष्टि व्यक्त गर्दै आएको छ ।
देउवाले न्यायोचित व्यवहार नगरेपछि कोइराला समूहले ४० प्रतिशत भागभण्डा खोज्ने अवस्थामा पुगेको छ । सभापतिमा निर्वाचित भएको ८ महिना पुगिसक्दा पनि देउवाले न्यायोचित रुपबाट अवसरको वितरण नभएपछि ४० प्रतिशतको भागभण्डा खोज्नुपर्ने बाध्यकारी अवस्थामा पुगेको कांग्रेस नेता गुरुराज घिमिरे बताउँछन् ।
बैठकपछि सञ्चारकर्मीहरूसँग कुरा गर्दै घिमिरेले भने “हाम्रो सभापतिको उम्मेद्वार शेखर कोईरालाले भन्नुभएको थियो– न्यायोचित रुपमा अवसरको वितरण गर्नुहोस् । म भागभण्डा माग्दिन भन्नुभएको थियो । ८ महिनामा न्यायोचित रुपबाट अवसरको वितरण भयो त, भएन । गुटको प्रमाणपत्र नबोकेको व्यक्तिले त अवसर नै पाएन् । त्यो भएको हुनाले अब ४० प्रतिशत माग्नुपर्ने भयो । बाध्यकारी अवस्थामा हामि पुग्यौं । अब शेरबहादुर दाईले प्रतिष्पर्धी समूहलाई ४० प्रतिशत संख्या दिनुपर्यो ।”
आइतबार बसेको कोइराला समूहको बैठकपछि कुराकानी गर्दै घिमिरेले दबाब मुलक कार्यक्रम बनाएर आगाडि बढ्नुपर्ने धारणा राखे । उनले आन्तरिक विषयहरुलाई सुत्रबद्ध रुपमा उठाउन समन्वय समिति पनि बनाएको जानकारी दिए
।
कोइराला समूहले महिला, किसान, आदिवासि जनजाति संघ लगाएतका भातृ संस्थाहरुको कार्यक्रम तय गर्ने निश्कर्ष निकालेको छ । घिमिरेले समन्वय समितिकोे बैठक बसेपछि आवश्यकता अनुसार समानान्तर समितिको पनि कार्यक्रम गर्ने बताउँदै राष्ट्रिय भेलाको पनि कार्यक्रम सूची भित्रै रहेको बताए ।
