भागबण्डा मिलाउने नाममा जम्बो मन्त्रिममण्डल बनाएर आलोचना खेपेका बागमती प्रदेशका मुख्यमन्त्री राजेन्द्रप्रसाद पाण्डेले आफ्नो जिल्लाका २७ पत्रकारहरूलाई ल्यापटप बाँडेका छन् ।
बाग्मती प्रदेश सरकारले प्रविधि हस्तान्तरण भन्दै धादिङका २७ ‘पत्रकार’ लाई ल्यापटप बाँडेको हो । यसरी ल्यापटप पाउनेमा राजधानीबाट प्रकाशित हुने मूलधारका सञ्चारमाध्यमका संवाददाता देखि लिएर जिल्लामा रहेका पत्रकारका संघ संगठनका नेताहरू समेत छन् ।
असार १० गते नेपाल पत्रकार महासंघ धादिङ शाखाको लेटरप्याटरमा २७ पत्रकारहरूको नामसहित ल्यापटप दिनको लागि पत्र लेखिएको भएतापनि अहिले आएर मात्र यस विषयले सञ्चारमाध्यममा स्थान पाएको हो ।
यस विषयमा बागमती प्रदेश अन्तरगत मुख्यमन्त्री कार्यालयका कर्मचारीहरू भने बोल्न चाहेनन् । केटिएम दैनिकले सम्पर्क गरेका सञ्चार र योजना शाखाका दुई अधिकृतहरूले आफूलाई यस विषयमा जानकारी नभएको बताए । कति मूल्यको ल्यापटप किनिएको हो भन्ने प्रश्नको उत्तर हामीले पाउन सकेनौँ ।
केही सञ्चारमाध्यमहरूमा ५० हजार रुपैयाँको ल्यापटप किनिएको भन्दै समाचार आएतापनि यसलाई पुष्टि गर्न सकिएन् । पछिल्लो समयमा उक्त मूल्यमा ल्यापटप उपलव्ध नहुने पुतलिसडकमा कम्प्युटरको विक्री वितरण गर्ने एक व्यवसायीले केटिएम दैनिकलाई बताए ।
उनका अनुसार सरकारी निकायले किन्ने सामानहरूको मूल्य आम मानिहसहरूलाई भन्दा बढी हुन्छ । त्यहाँ कमिसनको कुरा जोडिएको हुनाले बढी मूल्यको बिल बनाउनुपर्ने ती व्यापारीको अनुभव छ ।
पत्रकारहरूलाई ल्यापटप वितरण गरिएको यो पहिलो पटक भने होइन् । यसअगाडि पनि विभिन्न पालिकाहरूले पत्रकाहरूलाई ल्यापटप वितरण गरेका थिए । तर प्रदेशका मुख्यमन्त्रीले आफ्ना जिल्लाका पत्रकाहरूलाई मात्र ल्यापटप वितरण गर्नुलाई भने पदको दुरुपयोग मान्न सकिन्छ ।
यसरी ल्यापटप पाउनेहरूमा केही होटल सञ्चालक समेत रहेको भन्दै गुनासो आउन थालेको छ ।
केही समयअगाडि बागमती प्रदेशको सामाजिक विकास मन्त्रालयले प्रदेशभित्रका २४ महिला पत्रकाहरूलाई १८ हजार रुपैयाँको फेलोसिप भन्दै हेटौंडा बोलाएर एक दिने तालिम दिएको भएपनि रकम भुक्तानी गर्ने समयमा १२ हजार मात्र दिएर प्रतिव्यक्ति रु ६ हजार उसैले राखेको आरोप समेत लागेको छ ।