नेकपा एमालेका वरिष्ठ उपाध्यक्ष ईश्वर पोखरेलको निर्वाचन क्षेत्रमा रञ्जु दर्शनाले स्वतन्त्र उम्मेदवारी घोषणा गरेकी छिन ।
२०७४ को स्थानिय तहको निर्वाचनमा काठमाडौं महानगरापालिकामा मेयरकी उम्मेदवार घोषणा गरेकी दर्शनाले शुक्रवार राती काठमाडौं–५ मा संघीय निर्वाचनका लागि उम्मेदवारी घोषणा गरेकी हुन ।
२०७४ सालको प्रत्यक्षतर्फ प्रतिनिधि सभा निर्वाचनमा काठमाडौं क्षेत्र नम्बर ५ मा इश्वर पोखरेल २३ हजार २९ मतका साथ विजयी भएका थिए । उनका निकटतम् प्रतिस्पर्धी कांग्रेसका प्रकाश शरण महतले १३ हजार १६९ मत पाएका थिए । पोखरेल ९ हजार ८६० मतान्तरले विजयी भएका हुन् ।
‘तपाईहरूले विभिन्न माध्यम बाट आउने संघिय निर्वाचनमा मेरो उम्मेदवारी रहने कुरा थाहा पाइसक्नु भएको छ । आज आधिकारिक रूपमा आउने निर्वाचनमा काठमाडौँ क्षेत्र न. ५ बाट प्रतिनिधि सभा सदस्य पदमा निर्वाचित हुनका लागि प्रतिस्पर्धामा उत्रने कुरा यहाहरू समक्ष बाँड्न पाउँदा हर्षित छु ।’
गुगल फर्मको लिङ्क शेयर गर्दै उनले लेखेकी छिन् ‘तपाईहरू पनि यस अभियानको प्रत्यक्ष वा अप्रत्यक्ष रुपमा सारथी बन्न चाहनुहुन्छ भने तल दिइएको लिङ्कमा गइ फर्म भर्न हुन अनुरोध गर्दछु ।’
https://forms.gle/k79hH7vrKCN9upXo7
रञ्जुले अघिल्लो स्थानीय तह निर्वाचनमा काठमाडौं महानगरपालिकाको प्रमुख पदमा २३ हजार ४३९ मत ल्याउन सफल भएकी थिइन् । उक्त समयमा एमालेका विद्या सुन्दर शाक्य ६४ हजार ९१३ मतका साथ निर्वाचित हुँदा रञ्जुले तेस्रो स्थान कायम गरेकी थिइन् ।