गत वैशाख ३० गते सम्पन्न भएको स्थानीय तह निर्वाचनमा ७५३ मध्ये एक बाहेक अन्यको नतिजा सार्वजनिक भैसकेको छ ।
मुस्ताङको घरपझोङ गाउँपालिका अध्यक्षमा नेपाली कांग्रेसका मोहन सिंह लालचन ७६० मत ल्याएर विजयी भए । उनका निकटतम् प्रतिस्पर्धी नेपाल कम्युनिष्ट पार्टी (एमाले) का उम्मेदवार सन्जय कुमार थकालीले ७५८ मत पाए । लालचन जम्मा दुई मतान्तरले अध्यक्षमा विजयी भए ।
अघिल्लो निर्वाचनमा प्रमुख पदमा बराबरी मत आएर गोलाप्रथाबाट उम्मेदवार विजयी गराउनु परेको भएतापनि यो निर्वाचनमा भने त्यस्तो अवस्था रहेन् । सिंगल डिजिट (९ वा सोभन्दा कम) मतान्तरले विजयी हुने एकमात्र पालिका प्रमुख बने लालचन ।
यहाँ हामीले १०० भन्दा कम मतले विजयी भएका उम्मेदवारहरूको सूची तयार गरेका छौं । यो सूचीमा गाउँपालिका अध्यक्ष पदमा ४७ जना र नगरप्रमुखमा ११ जना छन् ।
दुई अंकको मतले विजयी हुनेमा सबैभन्दा बढी एमाले बाट उम्मेदवारी दिनेहरु छन् । एमालेबाट २५ जना १०० भन्दा कम भोटले विजयी हुँदा, नेपाली कांग्रेसबाट १९ जना, माओवादी केन्द्रबाट १० जना, स्वतन्त्र दुई, जसपा र एकीकृत समाजवादीबाट समान १/१ जना गरी कूल ५८ जना विजयी भएका छन् ।
एमालेबाट सातवटै प्रदेशमा १०० भन्दा कम मतान्तरले विजयी हुने उम्मेदवार हुँदा, नेपाली कांग्रेसबाहेक सुदूरपश्चिम बाहेक छ प्रदेशमा, माओवादी केन्द्रबाहेक गण्डकी र मधेश प्रदेश बाहेक अन्य पाँच प्रदेशमा, जसपा र एकिकृत समाजवादीबाट मधेश प्रदेशमा मात्र र स्वतन्त्रबाट कर्णाली र प्रदेश १ का स्थानीय तहको प्रमुख पदमा उम्मेदवारहरू निर्वाचित भएका हुन् । यसरी निर्वाचित भएका ५८ जनामध्ये महिलाको सङ्ख्या दुई छ भने ५६ जना पुरुष हुन् ।
प्रदेश १ मा एमालेबाट ५ जना, नेपाली कांग्रेसबाट ४ जना, माओवादी केन्द्रबाट २ जना र एक स्वतन्त्र गरी १२ जना विजयी भए ।
मधेश प्रदेशमा नेपाली कांग्रेसबाट तीन जना, एमालेबाट दुई जना, जसपा र एकीकृत समाजवादीबाट समान १/१ जना गरी ७ जना १०० भन्दा कम मतान्तरले विजयी भए ।
बागमती प्रदेशमा एमाले र नेपाली कांग्रेसबाट समान २ जना र माओवादी केन्द्रबाट १ जना गरी पाँच जना दुई अंकको मतान्तरले विजयी भए । तीमध्ये सिन्धुलीको फिक्कल गाउँपालिका अध्यक्षमा एमालेबाट निर्वाचित भएकी पार्वती सुनुवार महिला हुन् ।
गण्डकी प्रदेशमा एमालेबाट छ र नेपाली कांग्रेसबाट दुई गरी जम्मा ८ जना विजयी हुँदा लुम्बिनी प्रदेशमा माओवादी केन्द्रबाट तीन, नेपाली कांग्रेसबाट दुई र एमालेबाट एक गरी ६ जना एक सय भन्दा कम मतान्तरले विजयी भए ।
त्यस्तैगरी सुदूरपश्चिम प्रदेशमा एमालेबाट छ, माओवादी केन्द्रबाट एक गरी सात जना विजयी हुँदा कर्णाली प्रदेशमा नेपाली कांग्रेसबाट ७ जना, एमाले र माओवादी केन्द्रबाट समान ३/३ जना र एक स्वतन्त्र गरी १४ जना १०० भन्दा कम मतान्तरले विजयी भएका हुन् ।
कर्णाली प्रदेशको दैलेख जिल्लामा रहेको भैरवी गाउँपालिका अध्यक्षमा नेपाली कांग्रेसबाट निर्वाचित रिता कुमारी शाही महिला हुन् ।
सूची