स्थानीय तह निर्वाचनमा जनप्रतिनिधि निर्वाचित हुनेमा दोस्रो नम्बरमा रहेको नेपाल कम्युनिष्ट पार्टी (एमाले) भोट पाउनेमा भने प्रथम नम्बरमा रहेको छ । उसले नेपाली कांग्रेसले भन्दा २ लाख ७ हजार ३८१ बढी मत पाएको देखिन्छ ।
झट्ट सुन्दा असुहाउँदो लाग्न लाग्छ । यसको दुईवटा कारण छन् पहिलो कारण त एमालेबाट विजयी भएका उम्मेदवारहरू धेरै मतान्तरले विजयी भए । अर्को मुख्य कारण भनेको उम्मेदवारी मनोनयनमा एमाले पहिलो नम्बरमा छ । धेरै उम्मेदवार भएपछि स्वत नै धेरै भोट आउँछ ।
निर्वाचन आयोगले सार्वजनिक गरेको अन्तिम उम्मेदवारको नामावली केलाउने हो भने एमालेबाट सबै पदहरूमा गरेर कूल ३३ हजार २४१ उम्मेदवारी पर्दा नेपाली कांग्रेसबाट ३० हजार ७९० उम्मेदवारी दर्ता भए । निर्वाचनबाट ३५ हजार २२१ जनप्रतिनिधीहरू निर्वाचित हुनुपर्नेमा एमालेले पनि केही स्थानीय तहमा अन्य दलहरूसँग सहकार्य गर्यो । त्यसैले अहिले सम्पन्न भएको चुनावमा कुनै पनि दलले सत प्रतिशत उम्मेदवारी दिन सकेनन् ।
अब लागौं निर्वाचनमा पाएको भोट तर्फ । २९३ नगरपालिका मध्ये नेकपा एमालेले २८८ नगरको प्रमुख पदमा उम्मेदवारी दिएको थियो । सूर्य चिह्नमा नगरप्रमुखमा २३ लाख ४८ हजार ७०९ र गाउँपालिका अध्यक्षमा १४ लाख ७२ हजार ९५९ गरेर कूल प्रमुख पदमा ३८ लाख २१ हजार ६६८ भोट खस्यो ।
नगर उप-प्रमुख पदमा २२ लाख ७० हजार ३२४ र गाउँपालिका उपाध्यक्ष पदमा १४ लाख ११ हजार १४७ गरेर उपप्रमुख पदमा ३६ लाख ८१ हजार ४९८ भोट खस्यो । जुन नगरप्रमुख पदमा खसेको मतभन्दा ७८ हजार ३8५ र गाउँपालका अध्यक्षमा भन्दा उपाध्यक्षको मत ६१ हजार ७८५ ले कम हो ।
त्यस्तैगरी वडाअध्यक्षमा ३८ लाख ११ हजार ६३२ मत खस्दा वडा सदस्यमा ३६ लाख ६० हजार २६३ भोट खस्यो (महिला सदस्य,दलित महिला सदस्य र दुई खुला सदस्यमा खसेको मतको औसत) । नेकपा एमालेले विभिन्न पदमा पाएको मतको औसत निकाल्ने हो भने ३७ लाख सात हजार ९७८ हुन आउँछ ।
अब लागौं सत्ता गठबन्धनको प्रमुख घटक नेपाली कांग्रेसतर्फ । कांग्रेसबाट ३० हजार ७९१ उम्मेदवारहरू चुनावमा सहभागी भए, तीमध्ये १३ हजार ७५३ जना निर्वाचित भए ।
नेपाली कांग्रेसका उम्मेदवारले पाएको भोटभन्दा एमालेले पाएको भोटको सङ्ख्या आठ लाख ५२ हजार ५३४ ले बढी छ । यसले एमाले भोट सङ्ख्याको आधारमा पहिलो पार्टी भएको पुष्टि गर्छ ।
कांग्रेसबाट प्रमुख पदमा उम्मेदवारी दिएका २६२ जनाले २२ लाख ७९ हजार ३६३ मत पाउँदा गाउँपालिका अध्यक्षका उम्मेदवारहरूले पाएको मतको सङ्ख्या १४ लाख ६७ हजार ३८८ छ । गाउँपालिका अध्यक्षमा सो पार्टीबाट ३७० जना चुनावी प्रतिस्पर्धामा थिए । यसरी प्रमुख पदमा नेपाली कांग्रेसले ३७ लाख ४६ हजार ७५१ मत पाएको देखिन्छ । जुन नेकपा एमालेले पाएको मतभन्दा ७४ हजार ९१७ मतले कम हो ।
कांग्रेसबाट नगर उपप्रमुख पदमा १९२ जना र गाउँपालिका उपाध्यक्ष पदमा ३४२ जना चुनावी प्रतिस्पर्धामा थिए । नगर उपप्रमुखमा १५ लाख १५ हजार ३९८ र उपाध्यक्ष पदमा १२ लाख ७१ हजार ५० गरी कूल २७ लाख ८६ हजार ४४८ मत खसेको हो । सो पदमा एमालेभन्दा नेपाली कांग्रेसले पाएको मत आठ लाख ९५ हजार ५० ले कम छ ।
पदअनुसारको भोट सङ्ख्या हेर्ने हो भने नेपाली कांग्रेसले वडाअध्यक्ष र महिला सदस्यमा सर्वाधिक भोट पाएको छ । वडाअध्यक्षमा कांग्रेसले पाएको भोटको सङ्ख्या एमालेले पाएको भन्दा एक लाख ४४ हजार ४९४ ले बढी छ भने महिला सदस्यमा १५ हजार ९०४ ले बढी छ । त्यसबाहेकका अन्य पाँच पदमा भने नेकपा एमालेले सर्वाधिक मत पाएको निर्वाचन आयोगको तथ्याङ्कले देखाउँछ ।
यसको प्रमुख कारण भनेको चुनावी गठबन्धन गर्दा नेपाली कांग्रेसले धेरै स्थानमा उपप्रमुख पदमा माओवादी केन्द्र लगायत अन्य गठबन्धनका दलहरूलाई दिएको देखिन्छ । ७५३ स्थानीय तहमध्ये सो पदमा नेपाली कांग्रेसबाट ५३४ जना मात्र उम्मेदवार थिए जवकी नेकपा एमालेबाट सो पदमा उम्मेदवार हुनेको सङ्ख्या ७१७ थियो ।
माथिनै उल्लेख गरियो वडाअध्यक्ष पदमा नेपाली कांग्रेसले सर्वाधिक मत पाएको छ । नेकपा एमालेले भन्दा कम सङ्ख्यामा वडाअध्यक्ष पदमा उम्मेदवारी दिएको भएतापनि अन्तिम मतपरिणाम सार्वजनिक हुँदा कांग्रेसका उम्मेदवारले ३९ लाख ५६ हजार १२६ मत पाए ।
वडाका महिला सदस्य, दलित महिला सदस्य र खुल्ला सदस्यले पाएको मतको औसत ३६ लाख ५३ हजार ४९७ दशमवल ५० हुन्छ । यसरी सबै पालिकामामा नेपाली कांग्रेसबाट चुनावमा सहभागी भएका ३० हजार ७९० उम्मेदवारले पाएको मतको औसत निकाल्ने हो भने ३५ लाख ८६ हजार १७८.८६ हुन्छ जुन नेकपा एमालेका उम्मेदवारले पाएको मतभन्दा एक लाख २१ हजार ७९१ ले कम हो तर पनि जनप्रतिनिधिहरू निर्वाचित हुनेमा कांग्रेस ने पहिलो दल बनेको छ ।
समग्रमा तेस्रो पार्टी बनेको नेकपा माओवादी केन्द्रबाट उम्मेदवार नै २० हजार ८०१ जना थिए । निर्वाचनको अन्तिम परिणाम सार्वजनिक हुँदा एक चौथाई भन्दा पनि कम अर्थात २४.२५ प्रतिशत उम्मेदवारहरू जनप्रतिनिधि बने । उम्मेदवारी नै कम सङ्ख्यामा भएपछि स्वत नै कम भोट आउने नै भयो ।
माओवादी केन्द्रले प्रमुख पदमा पाएको भोट एमालेको भन्दा २४ लाख ८३ हजार ७६३ र कांग्रेसले पाएको भन्दा २४ लाख ८ हजार ८४६ ले कम हो ।
उक्त पार्टीले नगर प्रमुख पदमा छ लाख २७ हजार ६९३ र गाउँपालिका अध्यक्षमा सात लाख १० हजार २१२ गरी प्रमुख पदमा कूल १३ लाख ३७ हजार ९०५ मत पाएको छ ।
यस पार्टीबाट प्रमुखमा १५५ र अध्यक्षमा २६३ गरी कूल ४१८ जना निर्वाचनमा सहभागी भएकोमा प्रमुखमा २५ र अध्यक्षमा ९६ जना गरी १२१ जना निर्वाचित भएका छन् । जसमध्ये चार जना मात्र महिला हुन् बाँकी सबै पुरुष उम्मेदवार हुन् ।
उपप्रमुख पदमा १६ लाख ९६ हजार ३९८, वडा अध्यक्षमा १५ लाख तीन हजार १८९ र वडासदस्यमा १४ लाख २ हजार ३५८.७५ मत पाउँदै औसतमा १४ लाख ४९ हजार ५६१ मत नेकपा (माओवादी) लाई गएको देखिन्छ ।
माओवादी केन्द्रले प्रमुख पदमा पाएको भोट एमालेको भन्दा २४ लाख ८३ हजार ७६३ र कांग्रेसले पाएको भन्दा २४ लाख ८ हजार ८४६ ले कम हो ।
जनप्रतिनिधि निर्वाचित गराउने कुरामा चौथो पार्टी बनेको जनता समाजवादी पार्टीले औसतमा ५ लाख ५३ हजार ४४३ मत पाएको छ । (कूल पाएको ३८ लाख ७४ हजार १०१ मतलाई सात पदसङ्ख्याले भाग गर्दा आउने भागफल ।)
नेकपा एकीकृत समाजवादीले औसतमा चार लाख २७ हजार ८५५ भोट पाएको छ । नेकपा (एस) ले प्रमुख र उपप्रमुख पदमा जसपाभन्दा बढी मत ल्याएको देखिन्छ । अन्य पदहरूमा भने जसपाले ले नै बढी मत पाएको छ ।
लोकतान्त्रिक समाजवादी पार्टी, नेपाल (लोसपा) ले कम भोट पाएको भएतापनि सो पार्टीबाट निर्वाचित भएका जनप्रतिनिधिको सङ्ख्या राप्रपाको भन्दा बढी छ । राजेन्द्र लिङ्देन नेतृत्वको राप्रपाले ३ लाख ८२ हजार ७६१ मत पाउदा लोसपाको मत दुई लाख ३५ हजार ३३ रहेको छ । लोसपाबाट ५८१ जनप्रतिनिधि निर्वाचित हुँदा राप्रपाबाट निर्वाचित भएका जनप्रतिनिधिहरुको सङ्ख्या ३०५ रहेको छ ।
वडाध्यक्ष र कूल जनप्रतिनिधिले पाएको मत