२०७४ साल र अहिलेको स्थानीय तह निर्वाचनको नतिजा समीक्षा गर्ने हो भने गठबन्धनमा रहेर पनि माओवादी केन्द्रलाई झापा जिल्लामा घाटा लागेको छ । २०७४ सालको चुनावमा एक्लै लड्दा २३ सिट जितेकोमा अहिले गठबन्धनसहित हुँदा १८ सिटमै खुम्चिनु परेको हो ।
झापा जिल्लामा प्रमुख पार्टी बनेको नेकपा एमालेबाट अघिल्लो निर्वाचन भन्दा कम सङ्ख्यामा जनप्रतिनिधिहरू निर्वाचित भए । २०७४ सालमा ४६१ जना जनप्रतिनिधिहरू निर्वाचित भएकोमा यो चुनावबाट ४१७ जना मात्र निर्वाचित हुन पुगे ।
नेपाली काँग्रेसलाई भने झापा जिल्लामा समग्रमा गठबन्धन फापेको देखिन्छ । काँग्रेस महामन्त्री विश्वप्रकाश शर्माकै गृह नगरमा एमालेले कांग्रेसबाट प्रमुख पद खोसेको भएता पनि समग्र जिल्लाभरमा अघिल्लो निर्वाचनमा भन्दा बढी सङ्ख्यामा प्रमुखसहित जनप्रतिनिधिहरू निर्वाचित भएका छन् ।
आठ नगरपालिका सहित १५ वटा स्थानीय तह रहेको झापा जिल्लामा १३१ वटा वडा छन् । २०७४ सालको निर्वाचनमा तीमध्ये एक वडामा दलित महिला सदस्य पदमा मनोनयन नै नपरेको निर्वाचन आयोगको तथ्याङ्कले देखाउँछ । जसले गर्दा कूल ६८५ जनप्रतिनिधिहरू निर्वाचित हुनुपर्नेमा ६८४ मात्र भएको थियो । तर अहिलेको निर्वाचनबाट भने ६८५ जनप्रतिनिधिहरू निर्वाचित भएका छन् ।
अघिल्लो निर्वाचनमा स्वतन्त्र सहित पाँच राजनैतिक दलको स्थानीय तहमा प्रतिनिधित्व भएकोमा यो पटक थप दुई राजनैतिक दल समावेश भएका छन् । नेपाल कम्युनिस्ट पार्टी (एकीकृत समाजवादी) र सङ्घीय लोकतान्त्रिक राष्ट्रिय मञ्च यो चुनावबाट स्थानीय तहमा प्रतिनिधित्व गर्न सफल भएका हुन् ।
नेकपा एमाले
पूर्व प्रधानमन्त्री तथा नेकपा एमाले अध्यक्ष केपी शर्मा ओलीको गृह जिल्लामा अघिल्लो चुनावको तुलनामा सो पार्टीले दुई उपप्रमुख, १८ वडा अध्यक्ष र २४ वडा सदस्य गुमाउनु परेको छ ।समग्रमा उक्त पार्टीले ४४ सिट गुमाएको हो ।
प्रमुख (अध्यक्षसहित) भने समान सिट जित्न सफल भएको छ । ओलीको गृह नगरमा एमालेले प्रमुख पदमा पराजय भोग्नु परेको भएता पनि अन्य पालिकामा जित निकाल्दै यस पटक पनि सात वटा पालिका प्रमुख एमालेबाट निर्वाचित भएका छन् ।
नेपाली कांग्रेस
झापा जिल्लालाई एमालेको गढ मानिन्छ । नेपाली काँग्रेसका दुई नेताहरू महामन्त्री विश्वप्रकाश शर्मा र पूर्व महामन्त्री कृष्णप्रसाद सिटौला गुटको असर बेला बेला देखिँदै आएको छ । यी दुई नेताबीचको आपसी तालमेल नमिल्दाको असर चुनावमा पनि देखिन्छ ।
समग्रमा अघिल्लो निर्वाचनमा भन्दा २९ सिट बढी जितेको भएता पनि काँग्रेस यो पटक पनि झापामा दोस्रो पार्टी नै बन्यो । पदअनुसार हेर्ने हो भने प्रमुख र उपप्रमुखमा अघिल्लोभन्दा १/१ बढी र १३ वडा अध्यक्ष र १४ वडा सदस्य २०७४ को तुलनामा यो पटक बढी निर्वाचित भए ।
राप्रपा
राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनको गृह जिल्ला समेत रहेको झापा जिल्लामा अघिल्लो निर्वाचनको तुलनामा राप्रपाले राम्रो नतिजा ल्यायो । केपी शर्मा ओलीको गृह नगरमा राप्रपाका राम थापा निर्वाचित भए । दमक नगरपालिकामा सत्ता गठबन्धनसँग चुनावी तालमेल गरेर भए पनि राप्रपाले दमक नगरको प्रमुख पदमा आफ्ना उम्मेदवार निर्वाचित गराउन सफल भयो ।
२०७४ सालमा तीन पालिका प्रमुख जितेकोमा अहिले राप्रपामा दुई पालिका प्रमुखमा खुम्चिएको छ भने उपप्रमुखमा भने अघिल्लो भन्दा थप एक बढाएर दुई पालिकामा विजयी भएको छ । वडा अध्यक्ष पदमा समान सिट भएता पनि सदस्य पदमा भने अघिल्लो निर्वाचनको तुलनामा सात सिट बढी जित्दै ३१ वडा सदस्य निर्वाचित भएका छन् । समग्रमा ४२ जनप्रतिनिधिहरू निर्वाचित गराउँदै राप्रपा झापा जिल्लामा तेस्रो पार्टी बन्न सफल भएको छ ।
माओवादी केन्द्र
गठबन्धनमा रहेको भएता पनि माओवादी केन्द्र खुम्चिनु पर्यो । यी दुवै निर्वाचनमा उक्त पार्टीबाट पालिका प्रमुख र उपप्रमुखमा जनप्रतिनिधिहरू निर्वाचित भएनन् । वडामै सीमित रहेको माओवादी केन्द्रले अघिल्लो पटक ६ वडा जितेकोमा यो पटक थप एक बढाउँदै सात वडा जित्न सफल भएता पनि वडा सदस्य भने पहिलेको तुलनामा कम निर्वाचित भए । जसले गर्दा समग्रमा माओवादी केन्द्र २३ सिटबाट १८ सिटमा खुम्चिन पुग्यो ।
नेकपा (एकीकृत समाजवादी)
एमालेबाट टुक्रिएर एकीकृत समाजवादी बनेको माधव नेपाल नेतृत्वको उक्त पार्टीले माओवादी केन्द्रजस्तै कुनै पनि पालिका प्रमुख र उपप्रमुखमा जित निकाल्न सकेन । एक वडा अध्यक्ष र चार वडा सदस्य नेकपा एसबाट निर्वाचित भएको निर्वाचन आयोगको तथ्याङ्कले देखाउँछ ।
सङ्घीय लोकतान्त्रिक राष्ट्रिय मञ्च नेपालबाट एक जना वडा सदस्य निर्वाचित भए । कनकाई नगरपालिका-७ मा उक्त पार्टीबाट निर्मल आङथुपो (लिम्बू) वडा सदस्यमा निर्वाचित भएका हुन् ।
अघिल्लो निर्वाचनमा झापा गाउँपालिका-५ मा स्वतन्त्र उम्मेदवार निर्वाचित भएकोमा यो पटक भने सोही पालिकाको वडा नम्बरमा ३ र ५ मा स्वतन्त्र उम्मेदवार वडा अध्यक्षमा निर्वाचित भए साथै गौरादह नगरपालिका-१ र बाह्रदशी गाउँपालिका-४ मा पनि स्वतन्त्र उम्मेदवार नै वडा अध्यक्ष पदमा विजयी भए । यो पटक थप पाँच जना वडा सदस्य निर्वाचित हुँदै स्वतन्त्रबाट कूल ९ जना निर्वाचित भए जुन नेकपा एसबाट निर्वाचित हुनेको भन्दा बढी हो ।