झापाको मेचीनगर नगरपालिकाको प्रमुख र उपप्रमुखमा एमालेका उम्मेद्वार निर्वाचित भएका छन् ।
नगर प्रमुखम एमालेका गोपालचन्द्र बुढाथोकी र नगर उप-प्रमुखमा मीना कुमारी पोख्रेल निर्वाचित भएका हुन् । पोखरेल यसअगाडि पनि सोही नगरको उपप्रमुख थिइन् ।
विश्वप्रकाश शर्माको गृहनगर समेत रहेको यस नगरमा नेपाली कांग्रेसबाट उम्मेदवार मनोनयन गर्ने क्रममा प्रदेश कमिटीले गरेको निर्णयलाई लत्याउँदै केन्द्रबाट छुट्टै परिपत्र गएको थियो ।
सिटौला र विश्वप्रकाश गुटकै कारण महामन्त्रीको गृहनगरमा माओवादीसँग गठबन्धन गरेको नेपाली कांग्रेसले हार्नुपरेको केहीले बताउँदै आएका छन् । यसअगाडि सो पालिकाको प्रमुख पदमा नेपाली कांग्रेसका विमल आचार्य निर्वाचित भएका थिए ।
निर्वाचन अधिकृतको कार्यालयका अनुसार नगर प्रमुखमा नेकपा एमालेका उम्मेदवार गोपाल बुढाथोकीले २६ हजार ४७८ मत पाएका छन् भने उनका निकटतम् प्रतिस्पर्धी गठबन्धनबाट नेपाली कांग्रेसका इन्द्रबहादुर बुढाथोकीले २१ हजार ३११ मत ल्याए । एमालेका बुढाथोकी पाँच हजार १६७ मतान्तरले विजयी भएका हुन् ।
राप्रपाका रमेश दाहालले तीन हजार ८९५ मत पाउँदा मंगोल नेशनल अर्गनाइजेसनका किशोर धिमालले एक हजार ८८७ मत पाउँदै चौथो स्थानमा पुगे ।
उपप्रमुखमा एमालेकी मीना कुमारी पोख्रेलले २१ हजार ५९० मत पाएर निर्वाचित हुँदा गठबन्धनबाट माओवादी केन्द्रका प्रकाश भण्डारीले जम्मा १२ हजार ८१८ मत पाए । सोही पदमा राप्रपाकी सबिना बजगाईको मत ९ हजार ८८० आएको छ ।
१५ वडा रहेको उक्त नगरमा एमाले ११, नेपाली कांग्रेसले तीन र माओवादी केन्द्रबाट एक वडाअध्यक्ष निर्वाचित भए । एमालेले वडा नं. १, २, ३, ४, ५, ७, ९, १०, ११, १२ र १३ जित्दा नेपाली कांग्रेसले ६,८ र १५ त्यस्तैगरी माओवादी केन्द्रले १४ नम्बर वडाको वडाअध्यक्ष जितेको हो ।
महामन्त्री शर्माको गृहवडा समेत रहेको ९ नम्बर वडामा पनि एमाले नै विजयी भएको छ ।