निकै चासोका साथ हेरिएको भरतपुर महानगरमा स्वतन्त्र उम्मेदवार जगन्नाथ पौडेलले १२ हजार मत कटाएका छन् ।
भूईँकटहर चुनाव चिह्नका पौडेलले यो समाचार तयार पार्दासम्म १२०७० मत पाएका छन् ।
पाँचदलीय गठबन्धनमा नेकपा (माओवादी केन्द्र)बाट उम्मेदवार बनेकी रेणु दाहालले झण्डै आठ हजारको अग्रता लिएकी छन् ।
९० हजार भन्दा बढी मतगणना गर्दा उनले ३६२७२ मत प्राप्त गरेकी छन् भने नेकपा (एमाले)का विजय सुवेदीले २८४१८ मत प्राप्त गरेका छन् । यी दुई उम्मेदवारबीच सात हजार ८५४ मतको अन्तर छ ।
उपप्रमखमा गठबन्धनबाटै नेपाली कांग्रेसका चित्रसेन अधिकारीले राष्ट्रिय प्रजातन्त्र पार्टी (राप्रपा)का हिमला गुरुङलाई १५ हजार ४२६ मतान्तरले अग्रता लिएका छन् । अधिकारीले ३७ हजार ३२६ मत प्राप्त गर्दा गुरुङले २१ हजार ९०० मत प्राप्त गरेकी छन्।
भरतपुर महानगरमा हालसम्म १ देखि १७ नं वडासम्मको गणना सम्पन्न भइसकेको छ । अहिले अन्य वडाको मतगणना जारी रहेको छ ।
यस पालिकामा २९ वटा वडा रहेको छ । स्थानीय तह निर्वाचन २०७९ मा यहाँ एक लाख २७ हजार ८३९ मत खसेको थियो ।