दुबई पठादिन्छु भन्दै पाँच व्यक्तिबाट नौ लाख ५० हजार रुपैयाँ लिएर फरार भएका दुई व्यक्तिलाई प्रहरीले पक्राउ गरेको छ ।
दुबई जानको लागि प्रतिव्यक्ति एक लाख ९० हजारको दरले पाँचजनाबाट नौ लाख ५० हजार लिएर फरार भएका विकास तामाङ (वर्ष ३३) र हरी बहादुर तामाङ (वर्ष ६०) लाई काठमाण्डौ उपत्यका अपराध अनुसन्धान कार्यालयबाट खटिएको टोलीले पक्राउ गरेको हो ।
पक्राउ परेका दुवैजना वीरगञ्ज महानगर ५ का स्थायी बासिन्दा भएतापनि पछिल्लो समय ललितपुरको ठेचोमा बस्दै आएका थिए । उनीहरूले दुबईको एक कम्पनीमा मासिक तीन हजार दिराम तलब हुन्छ भन्दै पाँच जनाबाट उक्त रकम असुलेर फरार भएका थिए ।
वैदेशिक रोजगार विभागले पक्राउ गरिदिन पत्राचार गरेपछि विकास तामाङलाई चुच्चेपाटीबाट बुधबार र हरी बहादुर तामाङलाई ललितपुरको जावलाखेलबाट बिहीबार पक्राउ गरेर आज (शुक्रबार) सार्वजनिक गरेको हो ।
दुवैलाई थप अनुसन्धान तथा कारबाहीको लागि वैदेशिक रोजगार विभाग बुद्धनगर पठाइएको छ ।
