नेपाल चेम्बर अफ कमर्स र आईएमएफका प्रतिनिधिबीच मङ्गलवार भेटवार्ता भएको छ ।
आइएमएफका एसिया प्यासिफिक विभागका प्रमुख श्री रवर्ट ग्रेगोरीको नेतृत्वमा नेपाल आएको प्रतिनिधि मण्डल र चेम्बर अफ कमर्सका पदाधिकारीहरू बिच आज काठमाडौँमा अन्तरक्रिया कार्यक्रम सम्पन्न भएको हो ।
उक्त कार्यक्रममा चेम्बरका अध्यक्ष राजेन्द्र मल्लले हाल मुलुकमा तरलताको अभावले अर्थतन्त्रमा शिथिलता देखिएको उल्लेख गर्दै विकास साझेदार संस्थाहरूले ऊर्जा,पर्यटन तथा कृषि क्षेत्रलाई प्राथमिकता दिनुपर्ने बताएका छन् ।
उनले कोभिड-१९को प्रकोपको सन्दर्भमा आईएमएफले प्रदान गरेको सहयोगको लागि धन्यवाद ज्ञापन गर्दै कृषिलाई प्राथमिकता दिन फुड बैङ्कको व्यवस्था हुनु पर्ने र दोहोरो अङ्कको आर्थिक वृद्धिको लागि एकल अङ्कको व्याज दर हुनु पर्नेमा जोड दिए । उनले साना तथा मझौला उद्यमहरूलाई आईएमएफ जस्ता संस्थाहरूबाट सहयोग प्रदान हुनु पर्ने जिकिर गरे ।
जवाफमा रबर्ट ग्रेगोरीले नेपालमा ६ महिनाको लागि विदेशी मुद्राको भण्डार रहेकोले सन्तोषप्रद रहेको बताउँदै कोभिड नियन्त्रणको लागि गरिएको प्रयासको प्रशंसा गरेका थिए । उक्त अवसरमा नेपाल चेम्बर अफ कमर्सका वरिष्ठ उपाध्यक्ष कमलेश कुमार अग्रवाल, दीपक मल्होत्रा, दीपक श्रेष्ठ तथा सुरेन्द्र कुमार श्रेष्ठको पनि उपस्थिति रहेको थियो ।
