आसन्न स्थानिय निर्वाचनमा मोरङको सुन्दरहरैँचा नगरपालिका प्रमुखका लागि सम्भावित उम्मेदवारको नाम सिफारिस गर्ने क्रममा पार्टीभित्रको एक समूह अनुदार देखिएको छ ।
सस्थापन पक्ष अर्थात् शेरबहादुर देउवा निकट भएकै कारण बहालवाला मेयर शिवप्रसाद ढकालको नाम नगर कांग्रेसले सिफारिसबाट हटाएको छ । नगर कांग्रेसले सभापति भक्ती सिटौलाको मात्र नाम पठाएर पूर्वाग्रह देखाएको कांग्रेसका कार्यकर्ताले आरोप लगाएका छन ।
पछिल्लो पाँच वर्षमा देशव्यापी रूपमा लोकप्रिय मेयर रहेका ढकालले यो निर्णय पूर्वाग्रहपूर्ण भएको भन्दै नगर, क्षेत्र, जिल्ला , प्रदेश र केन्द्रमा लिखित उजुरी गरेका छन् ।
‘म मात्र होइन सुन्दरहरैचाका आम कांग्रेस र अन्य पार्टीका कार्यकर्ता समेत आश्चर्यचकित छन्’ ढकालले भने, ‘पार्टीमा निरन्तर काम गरिरहेको, बहालवाला मेयरलाई नै बाइपास गरेर सिफारिस गरिएको छ, यसले कांग्रेसलाई कमजोर बनाएको छ ।’
एमालेको बहुमत रहेको यो नगरमा ढकालको नेतृत्वमा सबैलाई मिलाएर काम गरिएको दाबी गरिन्छ । उत्तरी मोरङको विकासको कुरा उठ्दा ढकालको नाम सफल मेयरको रूपमा लिइन्छ ।
केही दिनअघि ढकालले प्रधानमन्त्री एवम् कांग्रेस सभापति शेरबहादुर देउवालाई बोलाएर भव्य कार्यक्रम गरेका थिए । देउवाले सार्वजनिक मञ्चबाटै ढकालको प्रशंसा गरेका थिए ।
‘स्थानीय निर्वाचन अन्तरपार्टी निर्वाचन होइन तर, साथीहरूले यसलाई मजाकका रूपमा लिए,’ ढकालले भने, ‘निर्वाचनमा अन्य दलसित भिड्नु पर्नेमा कांग्रेस आफैँ भिडिरहेको छ , यसरी कसरी निर्वाचनको नतिजा आफ्नो पक्षमा आउछ ?’
यसबारे नगर सभापति सिटौलालाई ढकालले भेटेर कुरा गर्दा कसैको दबाबमा परेर यस्तो निर्णय गरेको बताएका छन् ।