प्रदेश १ कै सबैभन्दा ठूलो स्वास्थ्य प्रतिष्ठान बिपी कोइराला स्वास्थ्य विज्ञान प्रतिष्ठान धरानले चैत १५ गतेदेखि स्वास्थ्य बीमा गरेका वीमितहरूको निःशुल्क उपचार नगर्ने घोषणा गरेको छ ।
प्रतिष्ठानका उपकुलपति डाक्टर ज्ञानेन्द्र गिरीले बुधबार एक सूचना प्रकाशित गर्दै बिमितहरूको उपचार नगरिने जानकारी दिएका हुन् ।
बीमामार्फत प्रतिष्ठानले गरेको खर्चको भर्पाइ सरकारले समयमै नगरेका कारण प्रतिष्ठानमा आर्थिक कठिनाइ उत्पन्न भएको जनाउँदै बिपीले अब बीमाबाट उपचार नगर्ने बताएको हो ।
यो घोषणा नसच्चिए प्रदेश १ र २ का हजारौं नागरिक विमा सेवामार्फत हुने उपचारबाट बञ्चित हुने उनले जारी गरेको विज्ञप्तिमा भनिएको छ ।
दैनिक तीन हजारभन्दा बढी बिरामीले ओपिडी सेवा लिँदै आएको प्रतिष्ठानमा स्वास्थ्य बीमा गरेका नागरिकले सेवा लिँदै आएका थिए । तर बीमावापतको रकम भर्पाइमा सरकारले ढिलाइ गरेको भन्दै बिपी प्रतिष्ठानले उपचार सेवा नदिने घोषणा गरेको हो ।
नेपाल सरकार स्वास्थ्य बिमा बोर्डबाट बीमा गरेका बीमितहरुलाई प्रतिष्ठानले २०७४ साउनदेखि स्वास्थ्य सेवा उपलब्ध गराउँदै आएको थियो ।
‘स्वास्थ्य विमाको कार्यक्रम सञ्चालन गर्दा देखिएका प्राविधिक तथा अन्य समस्याहरुको सहजीकरण गर्न विभिन्न समयमा स्वास्थ्य बिमा बोर्ड लगायत अन्य सरोकारपालाहरुलाई पटकपटक लिखित अनुरोध गर्दा पनि हालसम्म समाधान हुन सकेन,’ उपकुलपति गिरीले सार्वजनिक गरेको विज्ञप्तिमा भनिएको छ ‘यसबाट प्रतिष्ठान आर्थिक संकटमा परेको छ । शिक्षक तथा कर्मचारीलाई पारिश्रमिक दिन र दैनिक सञ्चालन खर्चमा समेत प्रतिकूल प्रभाव परेको छ ।’
गिरीका अनुसार विमामार्फत पाइने कुनै पनि सेवा बहिरंग, आकस्मिक तथा अन्तरंग सबै विभागमा उपचार बन्द गरिनेछ ।
