चिकित्सा शिक्षाको स्नातक तहको एमबीबीएस कार्यक्रमका लागि शिक्षण संस्थाहरूले चिकित्सा शिक्षा आयोगबाट निर्धारित शुल्कभन्दा बढी शुल्क लिएको भन्दै शुक्रबार शिक्षा, विज्ञान तथा प्रविधि मन्त्रालयमा सर्वदलीय बैठक डाकिएको थियो ।
राष्ट्रिय चिकित्सा शिक्षा आयोग, त्रिभुवन विश्वविद्यालय, काठमाडौं विश्वविद्यालय, काठमाडौं मेडिकल कलेज, नोबेल मेडिकल कलेज, अभिभावक एवम् विद्यार्थीहरूको बीचमा नेपालका चर्चित मेडिकल व्यावसायी सुनील शर्माको पनि उपस्थिति थियो । सुनील शर्मा त्यो नाउँ हो, जोसँग पछिल्लो समय विद्यार्थीहरू रुष्ट बनेका छन् । शर्मा सञ्चालक रहेको काठमाडौं मेडिकल कलेज र नोबेल मेडिकल कलेजले अतिरिक्त शुल्क लिएको भन्दै विद्यार्थीहरू केही समययता आन्दोलित छन् ।
उनीविरुद्ध काठमाडौँ र विराटनगरमा प्रदर्शन भइरहेको छ । उनी र शिक्षा, विज्ञान तथा प्रविधिमन्त्री देवेन्द्र पौडेलको उपस्थितिमा भएको बैठकमा चिकित्सा शिक्षा आयोगले तोकेभन्दा बढी शुल्क लिन नपाउने निर्णय भएको थियो, जसमा ‘नोट अफ डिसेन्ट’ लेखे । शर्माले मेडिकल कलेजको सुविधा र संरचनाअनुसार बढी शुल्क लिन पाउनुपर्ने अडान राखे । चिकित्सा शिक्षा आयोगको निर्णय अनुसारकै शुल्क लिनुपर्ने बैठकको निर्णयमा पनि उनले नोट अफ डिसेन्ट लेखेर निस्किएका थिए ।
मन्त्रीकै उपस्थितिमा भएको बैठकले गरेको निर्णयविरुद्ध नोट अफ डिसेन्ट लेखेका शर्मा मोसो दलिएपछि मन्त्रालयको बाथरुममा अनुहार धोएर घर फर्किए ।
तर बैठकमा आफ्नो असहमति जाहेर गरेर शिक्षा मन्त्रालयको गेटबाहिर निस्किन नपाउँदै उनी आक्रमणमा परे । मन्त्रालय परिसरमै उनलाई नोबेल मेडिकल कलेजमा अध्ययनरत विद्यार्थीले मोसो दले । पाँच जनाको समूहमा शिक्षा मन्त्रालयको गेटमा पुगेका उनीहरूले सुरुमा शर्मालाई ‘नमस्कार सर’ भनेका थिए । त्यसपछि उनीहरूलाई नमस्कारको प्रत्युत्तर पनि दिन नपाउँदै शर्मामाथि मोसो दलियो । मोसोले अनुहार पोतिएर शर्मा कालै भएका थिए । त्यसपछि उनी मन्त्रालयकै बाथरुममा मुख धोएर सिंहदरबारबाट बाहिरिएका छन् । उनीमाथि मोसो दल्ने पाँच जना विद्यार्थीलाई प्रहरीले तत्कालै पक्राउ गरेको छ ।
तर, सिंहदरबार उच्च सुरक्षा सतर्कता अपनाइएको क्षेत्रमा दलिएको मोसोले सुनील शर्मालाई मात्र दाग लगाएन हाम्रो प्रशासनिक र सुरक्षा संयन्त्रको अनुहारमा दाग लगायो । अनेरास्ववियू केन्द्रीय उप–महासचिव महेश श्रेष्ठ र नेता अमर पुन नेतृत्वको विद्यार्थीहरूको समूहले सिंहदरबार परिसरभित्रै मोसो दलेपछि हाम्रो सुरक्षा संयन्त्रमाथि प्रश्नचिन्ह उठेको छ ।
सिंहदरबारलाई उच्च सुरक्षा सतर्कता अपनाइएको क्षेत्रमा लिइन्छ । गृह मन्त्रालयले २ दिन अगाडि (पुस २८) मा एक सूचना जारी गर्दै सिंहदरबार परिसर प्रवेश गर्न यसअगाडि जारी गरिएका सबै स्थायी/अस्थाई पास बन्द गरेको जनाएको थियो । पास बन्द भएको अवस्थामा पनि सिंहदरबार भित्र पुगेका विद्यार्थीहरूले कडा सुरक्षाबीच पनि मोसो दल्न सफल भएपछि सुरक्षा संयन्त्रको अनुहारमा दाग लागेको विश्लेषण गर्न थालिएको छ ।
हुनत यसअगाडि पनि सिंहदरबारभित्र मोसो दल्ने प्रयास नभएका हैनन् । २७ असोज २०७४ मा तत्कालीन शिक्षामन्त्री गोपालमान श्रेष्ठमाथि पनि मोसो दल्ने प्रयास भएको थियो तर उक्त प्रयास सफल हुन भने पाएन । त्यो समय र अहिले फरक छ । पहिलो कुरा त सिंहदबार प्रवेशमा कडाइ गरिएको अवस्थामा कसरी विद्यार्थीहरू भित्र पसे भन्ने प्रश्न खडा हुन्छ ।
मोसो दल्ने विरोधस्वरूप राम्रो हैन । यसले व्यक्तिको सामाजिक प्रतिष्ठामाथि आँच पुर्याउँछ । यसको अर्थ सुनील शर्मा राम्रा मान्छे हुन् भन्ने खोजेको हैन । नक्कली सर्टिफिकेट भएको आधारमा नेपाल प्रहरीको केन्द्रीय अनुसन्धान ब्युरोको कुनै समयमा उनको खोजी गरेको भएतापनि उनी भागेर जापान पुगेका थिए । अहिले पनि चिकित्सा शिक्षा आयोगले निर्धारण गरेको भन्दा साढे ४ लाख अतिरिक्त शुल्क लिएको भन्दै विराटनगर नोबेल मेडिकल कलेजमा दिनहुँ आन्दोलन भइरहेको छ ।
उनलाई नेपाली कांग्रेसको १४ औं महाधिवेशनमा सभापति पदमा पराजित भएका शेखर कोइरालाको साथ र समर्थन रहेको बताइन्छ ।
