आइतबारदेखि नेपालमा कोरोना सङ्क्रमणको सङ्ख्या हजार नाघ्न थाल्यो । आइतबारदेखि आज शुक्रबारसम्म छ दिनको आँकडा नियाल्ने हो भने १६ हजार ७७२ जनामा कोरोना भाइरसको सङ्क्रमण पुष्टि भइसकेको छ ।
यो तथ्याङ्क त शङ्का लागेर कोरोना परीक्षण गराउन गएकाहरूको मात्र हो । दुर दराजका अझै कति व्यक्तिहरू स्वास्थ्य संस्थासम्म पुग्नै सकेका छैनन् । सुगममा भएकाहरू पनि कति डरले, त कति निको भइहाल्छ कि भनेर बसेका छन् । कतैबाट आँकडा उपलब्ध हुन नसेकपनि यस्ता व्यक्तिहरूको सङ्ख्या निकै उच्च रहेको अनुमान स्वास्थ्य क्षेत्रका विज्ञहरूको छ ।
आज (शुक्रबार) एकैदिन पाँच हजारभन्दा बढी जनामा कोरोना भाइरस पुष्टि भएपछि आम मानिसहरूमा फेरि लकडाउन त हुने हैन भन्ने चिन्ता देखिन थालेको उनीहरूको सामाजिक सञ्जालमा व्यक्त गरेका अभिव्यक्तिले पुष्टि हुन्छ ।
पिसिआर परीक्षण गरिएकामध्ये नतिजा पोजेटिभ देखिनेको दर २५ पुसमा ९ दशमलव पाँच प्रतिशतमा रहेकोमा उक्त दर बढेर आज ३१ दशमलव दुई प्रतिशत पुगेको छ । यसको अर्थ बितेको २४ घण्टामा पिसिआर परीक्षण गराएका एक सय जनामध्ये ३१ जनाभन्दा बढीमा सङ्क्रमण देखिएको हो ।
यो त भयो देशभरको सङ्ख्यात्मक विवरण । अझ, काठमाडौँ उपत्यकाको तथ्याङ्क भने झन् अत्यासलाग्दो छ । यो अवधिमा काठमाडौँ उपत्यकाभित्रका तीन जिल्लामा मात्र आठ हजार ८५६ जनामा सङ्क्रमण पुष्टि भयो, जुन देशभरिको सङ्ख्याको आधाभन्दा बढी हो । यसमा पनि काठमाडौँ जिल्लामा सङ्क्रमित हुनेको सङ्ख्या अन्य दुई जिल्लाको तुलनामा निकै उच्च छ । पुष २५ यता भक्तपुरमा ८२६ जना, ललितपुरमा १ हजार ३२६ र काठमाडौं जिल्लामा ६ हजार ६९४ जनामा सङ्क्रमण देखिएको छ ।
यही रफ्तारमा कोरोना सङ्क्रमण फैलिने हो भने यो यसले पहिलो र दोस्रो लहरभन्दा बढी क्षति गर्ने अनुमान गर्न सकिन्छ । तर पछिल्ला दिनहरूमा सङ्क्रमण तीव्र हावाझैँ फैलिए पनि मृत्युदर निकै कम छ यसले कम मानीवय क्षति हुने आँकलन गर्न सकिन्छ ।
सरकारले माघ ७ गतेदेखि सार्वजनिक सेवा लिनको लागि अनिवार्य खोप कार्ड लागू गरेपछि अहिले खोप केन्द्रहरूमा मानिसहरूको निकै भिडभाड देखिन थालेको छ । सरकारको यो निर्णयले खोप केन्द्रहरू कोरोनाको हटस्पट बन्ने सङ्केत देखिन थालेको छ । यसतर्फ सरकारको ध्यान जान जरुरी छ ।
पहिलो र दोस्रो डोज खोप लगाएकाहरूमा पनि सङ्क्रमण देखिन थालेको छ । त्यसैले सकेसम्म भिडभाडबाट टाढै बसौँ, जनस्वास्थ्यका मापदण्डहरू पालना गरौँ ।
