प्रदेश १ का आन्तरिक मामिला तथा कानुन मन्त्री केदार कार्कीले सम्पत्ति विवरण पेश गरेका छन् । जसअनुसार मन्त्री कार्कीको प्रदेश राजधानी विराटनगरमा सातवटा घडेरी रहेको छ । उनले कुल गरेर ११ ठाउँमा जग्गा रहेको सम्पत्ति विवरण पेश गरेका छन् । तथापि, सबै जग्गा उनको नाममा नभएर पत्नी शान्तादेवी बस्नेतको नाममा छ ।
उनको बूढीगङ्गा गाउँपालिका–२ स्थायी घर छ । घर भएको जग्गाबाहेक बूढीगङ्गामा तीन स्थानमा घडेरी छ । बूढीगङ्गा २ मा आठ धुर, ११ धुर र बूढीगङ्गा–८ मा तीन कट्ठा जग्गा छ । पत्नी बस्नेतको नाममा विराटनगर महानगरपालिका–७ को बजार क्षेत्रमा ६ वटा घडेरी छ । विराटनगर–९ मा एक बिघा, दुई कट्ठा, दुई धुर जग्गा छ ।
पछिल्लो पटक विराटनगर–७ मा रहेको रहेको १० कट्ठा जग्गा एक करोड २३ लाख ८१ हजारमा बिक्री गरेर विराटनगर ९ बखरीमा दुई करोड ७ लाखमा एक बिघा दुई कट्ठा जग्गा खरिद गरेको उल्लेख छ । यस्तै, कार्कीले बूढीगङ्गामा घर भएको जग्गा भने पैत्रिक सम्पत्ति भएको जनाएका छन् ।
विराटनगरमा जमिन बेचेर घडेरी किनेको उल्लेख गरेका कार्कीले बूढीगङ्गाको जग्गाको स्रोत भने तलब, बोनस र ऋण रहेको सम्पत्ति विवरणमा उल्लेख गरेका छन् । कार्की जागिरे होइनन्, उनकी पत्नी शान्तादेवी भने कृषि विकास बैङ्कमा कार्यरत छिन् ।
मन्त्री कार्कीको बैङ्कमा भने एक लाख रुपैयाँमात्रै पैसा छ । पत्नीको खातामा भने २३ लाख आठ हजार रुपैयाँ कृषि विकास बैङ्कमा र एभरेस्ट बैङ्कमा ८२ हजार छ । यसैगरी, छोरा शाकेतबाबू कार्कीको नाममा एक लाख १२ हजार र शाब्दीकबाबू कार्कीको नाममा तीन लाख ४७ हजार रुपैयाँ छ ।
कार्की परिवारसँग विवाहमा उपहार आएको र किनेको गरी २५ तोला सुन र ८० तोला चाँदी छ । त्यसबोक ३६ वटा कम्पनीको सेयर छ । कार्कीले कृषि विकास बैङ्कबाट २५ लाख रुपैयाँ ऋणि लिएको उल्लेख छ ।
नोट : यसअगाडिको तस्विरमा सुन २५ किलो र चाँदी ८० भएकोमा यसलाई सच्चाएर तोला बनाइएको छ । यसले पाठकहरूमा पर्न गएको भ्रमप्रति क्षमायाचना प्रकट गर्दछौं । सम्पादक