नेकपा(एकीकृत समाजवादी)का सम्मानित नेता झलनाथ खनालले एमाले अध्यक्ष केपी शर्मा ओलीले आफ्नो नारा चोरेको आरोप लगाएका छन् ।
उनले ‘सुखी नेपाली, समृद्ध नेपाल’ को नारा आफूले एमालेको नवौँ महाधिवेशनमा अगाडि सारेको दाबी गर्दै ओलीले त्यसलाई चोरेको बताए ।
बिहीबार काठमाडौंमा आयोजित पुस्तक लोकार्पण समारोहमा बोल्दै पूर्वप्रधानमन्त्री समेत रहेका खनालले आफूले सम्पूर्ण नेपालीको सपनाका रूपमा सो नारा अघि सारेको उनले दाबी गरे ।
सुखी नेपाली, समृद्ध नेपाल मैले नेकपा एमालेको ९ औं महाधिवेशनमा अगाडि सारेको नारा हो,’ खनालले भने, ‘कम्युनिष्ट आन्दोलन त्यति बेला ठ्याक्क ६५ वर्षमा पुगेको थियो ।
केपी शर्मा ओलीको सरकारले पनि त्यहि नारालाई आफ्नो नाराका रूपमा अघि बढाएपछि चर्चामा आएको हो । खनालले समाजवादमा पुगेर मात्रै यो नारा पूरा हुने बताए ।
एमाले दक्षिणपन्थी अवसरवादको आहालमा डुबिसकेकाले जति मलजल गरे पनि सो पार्टी अगाडि बढ्न नसक्ने उनको भनाइ छ। खनालले एमाले लगातार तल झरिरहेको र विखण्डनतर्फ गइरहेको दाबी गरे।
