नेकपा (एकीकृत समाजवादी)का सम्मानित नेता झलनाथ खनालले आफूहरुको प्रमुख उद्धेश्य समाजवादी लोकतन्त्र स्थापना गर्नु रहेको बताएका छन् । उनले पूँजीवादि जनवादी क्रान्ति सम्पन्न गरेर अब समाजवादी क्रान्ति सम्पन्न गर्ने बताउँदै देशमा समाजवादी लोकतन्त्र स्थापना गर्नेमा जोड दिए ।
नेता खनालले मुलुकमा समाजवादी लोकतन्त्र निर्माण गर्न नयाँ पार्टीको आवश्यकता रहेको बताउँदै उक्त आवश्यकता अनुरुप एकीकृत समाजवादी स्थापना गरेको दाबी गरे।
उनले भने, “पूँजीवादि जनवादी क्रान्ति सम्पन्न गरेर अब समाजवादी क्रान्ति सम्पन्न गर्ने हो र समाजवादी लोकतन्त्र स्थापना गर्ने हो यो देशमा । त्यो समाजवादी लोकतन्त्र स्थापनाको लागि एउटा नयाँ पार्टीको आवश्यकता थियो । त्यो पार्टीको आवश्यकता परिपूर्ति गर्ने ढंगले हामीले यो पार्टी निर्माण गरेका छौं । यो पार्टीको लक्ष्य भनेको अब समाजवाद हो । समाजवादी लोकतन्त्र हो । ”
सोमबार पार्टी कार्यालयमा आयोजित पार्टी प्रवेश कार्यक्रममा बोल्दै खनालले नवप्रवेशीहरुलाई निष्पक्ष र निस्वार्थरुपमा कार्यसम्पादन गर्न निर्देशन योग्यता, क्षमता अनुसार संगठनको जिम्मेवारी दिने जिकिर गरे ।
नवप्रवेशीहरुलाई पार्टीको नीति र लक्ष्य राम्ररी अध्ययन गर्न र पार्टीलाई बलियो बनाउने काममा दृढता पूर्वक लाग्न उनले सुझाव दिए ।
