नेपाली काङ्ग्रेसका प्रवक्ता विश्वप्रकाश शर्माले पार्टी सभापति तथा प्रधानमन्त्री शेरबहादुर देउवाको गुट छाडेर विद्रोह थालेका थिए । पार्टीको १४औँ केन्द्रीय महाधिवेशनमा सभापतिका उम्मेदवार शेखर कोइराला गुटमा कुरा नमिलेपछि उनले प्रकाशमान सिंहको प्यानलबाट महामन्त्री पदमा उम्मेदवारी दिएका थिए । कोइराला समूहबाट मिनेन्द्र रिजालले दाबी नछाडेपछि देउवा समूहबाट विद्रोह गरेका विश्वप्रकाशले कोइराला प्यानलबाट टिकट पाएनन् । कोइराला टिममा गगन र मिनेन्द्र उठ्दा उनी सिंह प्यानलमा जोडिएका थिए ।
पार्टीका बहालवाला सभापति देउवा गुटबाट सिंहको प्यानल रोज्दा धेरैले विश्वप्रकाशलाई विद्रोह गर्न सफल भएको भन्दै प्रसंशा गरेका थिए । तर उनको त्यो विद्रोह धेरै दिन टिकेन । तीन दिनभित्रै उनले थालेको विद्रोह बेकामे बन्यो । सभापतिका लागि दोस्रो चरणको निर्वाचन हुने पक्का भएसँगै विश्वप्रकाशका नेता प्रकाशमान सिंहले देउवालाई समर्थन गर्ने निधो गरेसँगै उनको विद्रोह बेकामे बनेको हो । प्रकाशमानको टिमले उम्मेदवारी दिनुअघि नै नेतृत्व परिवर्तन गर्ने भन्दै चुनाव लड्ने निधो गरेको थियो ।
प्रकाशमानको विचारसँग आफ्नो विचार मिलेको भन्दै कांग्रेस नेतृ सुजाता कोइरालाले पनि दाजु शेखरको टिम छोडेर सिंहको प्यानल रोजेकी थिइन् । शेखर गुटबाट विद्रोह थालेकी सुजतालाई उपसभापति बनाउन तयार रहेका प्रकाशमानले पहिलो चरणमै पराजय भोगेका थिए । तर दोस्रो चरणमा भने उनको टिमले नयाँ विकल्प खोज्दै शेखर रोज्ने आकलन लगाएपनि प्रकाशमानले देउवालाई नै समर्थन गर्ने निधो गरे । सिंहले नेतृत्व परिवर्तनका लागि भन्दै आफूले सभापतिमा उम्मेदवारी दिएको भएपनि देउवाप्रति महाधिवेशन प्रतिनिधिको स्वीकार्यता देखिएकोले दोस्रो चरणमा उनलाई सघाउने निर्णय गरेको स्पष्ट पारेका छन् । ‘सुजाता र विश्वजी हामी बसेर छलफल गर्यौँ, नेतृत्व परिवर्तन गर्नुपर्छ भनेर महाधिवेशनमा भाग लिएका हौँ,’ नेता सिंहले भने, ‘देशभरका अधिकांश महाधिवेशन प्रतिनिधिको देउवाजीलाई स्वीकार्यता देखिएकाले उहाँलाई समर्थन गर्ने निर्णय गर्यौँ ।’
यसअघि प्रकाशमानले पहिलो चरणमा जित्ने दाबी गर्दै दोस्रो चरणको निर्वाचन भएमा सबै मिलेर वर्तमान सभापति देउवालाई पराजित गर्ने ठोकुवा गरेका थिए । तर देउवा घरमा आएर फकाउँदा प्रकाशमान लुरुक्क परेपछि धेरैले विश्वप्रकाशलाई प्रश्न तेर्साएका छन् । आफ्ना नेतालाई किन बोली फेरेको भनेर सोध्नसमेत नसकेको भन्दै कतिले त उनलाई दासको उपनाम भिराएका छन् । स्रोतका अनुसार आफूलाई समर्थन गरेबापत देउवाले सिंहलाई तत्काल उपप्रधानमन्त्री र आगामी निर्वाचनपछि प्रधानमन्त्री बनाउने वचन दिएका छन् ।
देउवा र सिंहबीच ‘लेनदेन’बारे लिखित सम्झाैता नै भएकाे बताइए पनि सम्झाैता भने बाहिर ल्याइएकाे छैन । समाचार स्राेतका अनुसार देउवाले संसदीय बाेर्ड (संसदीय निर्वाचनमा टिकट बाँड्ने बाेर्ड) मा सिंह समूहका कम्तीमा दुई जना संलग्न गराउने र केन्द्रीय सदस्यमा चार-पाँच जनालाई मनाेनयन गर्ने प्रतिबद्धता जनाएका छन् ।
यता, आफ्ना नेता सिंहले देउवा रोजेपछि विश्वप्रकाशले पनि देउवालाई नै समर्थन गर्ने निधो बनाएका छन् । सिंहले सभापति चयनको लागि दोस्रो चरणमा हुने निर्वाचनमा देउवालाई समर्थन गरेपछि आफूले पनि सिंहकै निर्णय मान्ने उनको भनाइ छ । ‘सर्वसम्मति सर्वोत्तम । दोस्रो चरणमा जानैपर्दा प्रस्ट्याउँदछु – नेता प्रकाशमान सिंहको नेतृत्वमा महामन्त्रीको उमेदवार भएकाले उहाँ उभिनु भएको ठाउँमा म उभिनुपर्छ । पराजित भएपनि उहाँलाई साथ दिनु मेरो कर्तव्य हो । सहि निर्णय गर्न सक्ने उहाँको क्षमताप्रति म विश्वस्त छु’ उनले ट्वीटरमा लेखेका छन् ।
पहिलो चरणको चुनावमा सिंहले ३७१ मत ल्याएका थिए । कोइरालाले एक हजार ७२९ मत ल्याएका थिए । सभापतिका अर्का उम्मेदवार देउवाले दुई हजार २५८ मत ल्याएका थिए । विमलेन्द्र निधिले दुई सय ४९ मत ल्याएका छन् । अब सभापतिमा अन्तिम प्रतिस्पर्धा बढी मत ल्याएका देउवा र कोइरालाबीच हुनेछ । तथापि, निधि र सिंह दुवैको समर्थन पाएका देउवाको जित निश्चित देखिएको छ । मंगलबार बिहान निधि निवासमा भएको छलफलपश्चात दोस्रो चरणमा हुने निर्वाचनमा देउवालाई समर्थन गर्ने निर्णय भएको देउवाका स्वकीय सचित भानु देउवाले जानकारी दिए ।
सभापति पदका लागि दोस्रो चरणको मतदान आज दिउँसो ३ः३० बजे सुरु हुने छ । दोस्रो चरणको मतदान काठमाडौंको राष्ट्रिय सभागृहमा आज दिउँसो ३ः३० देखि साँझ ७ः३० सम्म हुनेछ । काँग्रेसको पार्टी विधान अनुसार पहिलो चरणमा कुनै पनि सभापतिका उम्मेदवारहरूले ५० प्रतिशतभन्दा बढी मत प्राप्त हुन नसक्दा सबैभन्दा बढी मत ल्याउने दुई जना प्रत्यासीबीच दोस्रो चरणको निर्वाचन हुने व्यवस्था छ ।
