नेपाल पत्रकार महासंघको महिला उपाध्यक्ष बाला अधिकारीले केही दिन अगाडि नेपाल पत्रकार महासंघको जिम्मेवारीबाट मुक्त हुने बताइन् ।
गत चैतमा भएको २६ औं महाधिवेशनमा सर्वाधिक मत ल्याएर महिला उपाध्यक्ष पदमा विजयी भएकी अधिकारीले आफू नेपाली कांग्रेसको राजनीतिमा लाग्नको लागि महासंघको जिम्मेबारीबाट मुक्त हुने खोजेको भन्दै मंसिर २० गते सामाजिक सञ्जालमा स्टाटस् लेखिन् ।
नेपाल पत्रकार महासंघको विधान अनुसार महासंघमा आवद्ध भएकाहरू कुनै पनि राजनैतिक दलको कुनै समिति वा पदाधिकारीमा बस्न पाइदैन । पत्रकार महासंघको विधानमा लेखिएको छ “महासंघको केन्द्रीय समिति प्रदेश समिति वा शाखा समितिका पदाधिकारी तथा सदस्यले सोपदमा बहाल रहेसम्म कुनै राजनीतिक दल वा भातृ संगठनको कुनै पनि तह, विभाग वा समितिमा रही काम गर्न पाउने छैन ।”
तर पत्रकार महासंघमा भने उनले लिखित रुपमा अहिलेसम्म राजीनामापत्र बुझाएकी छैनन् ।
शनिबार नेपाली कांग्रेसको १४ औं महाधिवेशनको लागि मनोनयन दर्ता गर्ने क्रममा केन्द्रीय सदस्य (खस आर्य महिला) पदमा उनको नाम २३ नम्बरमा छ । उनले सामाजिक सञ्जालबाट आफूले केन्द्रीय पदको उम्मेदवारी फिर्ता लिएको बताएकी छिन् ।
अब भने उनी फेरी नेपाल पत्रकार महासंघमै हुनेछिन् । सामाजिक सञ्जालमा पत्रकार महासंघको जिम्मेबारीबाट मुक्त भएको लेखेतापनि लिखित रुपमा राजीनामा पत्र नबुझाएको हुनाले उनी अहिले पनि नेपाल पत्रकार महासंघको उपाध्यक्ष नै हुन् ।