त्रिभुवन अन्तर्राष्ट्रिय विमानस्थलको भन्सार कार्यालयमा विदेशबाट आउने मानिसहरलाई कडाईका साथ जाँच गरिन्छ।
उनीहरुले मापदण्डभन्दा बढी सामान ल्याए कर जोडिन्छ अथवा धेरै सामग्री भएको खण्डमा जफत नै गरिन्छ। यो ठिक छ, किनभने सबैले नियमको पालना गर्नुपर्दछ। तर नियम सबैलाई लाग्नुपर्ने होइन र?
तर विमानस्थलमा सर्वसाधारणलाई मात्र कडाई गरेको पाइएको छ। त्यहीँ मन्त्रीलगायत उच्चपदस्थ व्यक्तिहरुलाई भने भन्सारमा छुट गरेको देखियो।
हालै संस्कृति, पर्यटन तथा नागरिक उड्डयनमन्त्री प्रेम आलेले भन्सार छली गरेर विभिन्न सामग्री नेपाल ल्याएको पाइएको हो।
उनले ७ वटा रोलेक्स घडी, ७ वटा आइफोन प्रो १३ र ९ बोतल रक्सी ल्याएको खुलासा भएको हो। गत नोभेम्बरमा लन्डनमा ट्राभल एन्ड टुरिजम एक्स्पो डब्लूटीएम आयोजना भएको थियो।
सो कार्यक्रममा भाग लिन पुगेका मन्त्री आलेले बेलायतबाट ती सामग्रीहरु ल्याएका हुन्। विदेशबाट फर्किने व्यक्तिले एउटा मोबाइल र एउटा घडी तथा ड्युटी फ्रीको रक्सीसमेत एक बोत्तलभन्दा बढी ल्याउन नपाइने भन्सार कार्यालयको नियम छ। नियमभन्दा बढी ल्याइए जफत गर्ने व्यवस्था छ।
तर मन्त्री आलेको हकमा भने त्यो लागू नभएको देखियो।