नेपाली कांग्रेस अर्घाखाँचीको सभापतिमा केशव श्रेष्ठ विजयी भएका छन् । श्रेष्ठले कुल १ हजार ४ सय १८ मतमध्ये ७ सय ३१ मत प्राप्त गरे । उनका निकटतम प्रतिद्वन्द्वी इन्द्रमणि पौडेलले ३ सय ५२ मतमै चित्त बुझाए । अर्का प्रत्यासी यादवप्रसाद घिमिरेले ३ सय ९ मत पाए । २७ मत बदर भएको छ ।
पौडेल पक्षीय श्रेष्ठ सभापतिमा निर्वाचित हुँदा शेरबहादुर देउवा पक्षीय घिमिरेले सबैभन्दा कम मत प्राप्त गरेका हुन् । देउवा पक्षका केन्द्रीय सदस्य पुष्पा भुसाल र मानबहादुर विश्वकर्माले घिमिरेलाई उम्मेदवार बनाएका थिए । श्रेष्ठलाई पौडेल पक्षका डा. रामबहादुर बिसीलगायतका नेताको समर्थन थियो ।
नेपाली कांग्रेसको १४ औं महाधिवेशन अन्तर्गत विभिन्न जिल्लामा भएको क्षेत्रीय अधिवेशनको प्रारम्भिक परिणाममा संस्थापन पक्ष कमजोर देखिएको छ । धेरै निर्वाचन क्षेत्र भएका जिल्लामा सभापति शेरबहादुर देउवाविरुद्ध संगठित संस्थापन इतर पक्षको बहुमत देखिएको छ ।
काठमाडौंका अधिकांश क्षेत्रमा संस्थापन पक्षले हार व्यहोरेको छ । संस्थापन इतर समूहका नेताहरु प्रकाशमान सिंह र गगन थापाको प्रभाव क्षेत्र रहेको काठमाडौंका १० क्षेत्रबाट कम्तीमा २ सय ५० महाधिवेशन प्रतिनिधि निर्वाचित हुन्छन् । परिणाम आएको काठमाडौं क्षेत्र नम्बर ७ मा संस्थापन इतर पक्षले क्लीन स्वीप गर्दा देउवा पक्ष नील भएको छ । अन्य क्षेत्रमा पनि देउवा पक्षका महाधिवेशन प्रतिनिधि नगण्य मात्रामा आएका छन् ।
र यो पनि : कांग्रेसको प्रारम्भिक परिणाम : देउवा ३५ प्रतिशतमा खुम्चिए, पौडेल पक्षको ६० प्रतिशत