कोरोना भाइरस महामारीका कारण लामो समययता सिनेमा हलरू बन्द अवस्थामा छन् । हालैमात्र नेपाली निर्माताहरूले दसैँलक्षित गरेर चलचित्र प्रदर्शन गर्ने तयारी थालिरहँदा चलचित्र सङ्घले पनि असोजको दोस्रो सातादेखि मुलुकभरकै सिनेमा हलहरूमा फिल्म प्रदर्शन गर्ने तयारीमा जुटेको छ ।
सङ्घका अध्यक्ष मधुसूदन प्रधान बीचमा बन्द गर्नु नपरोस् भनेर आठ–१० वटा फिल्मको क्यालेन्डर नै बनाइ सिनेमा हलहरू खोल्न लागेको बताउँछन् । दसैँ–तिहार नजिकिँदै गर्दा सिनेमा हलहरू खुल्नु भनेको फिल्म क्षेत्रलाई चलायमान बनाउने एउटा राम्रो अवसर पनि हो । चाडपर्वको मौका छोपेर केही वर्षअगाडि फिल्महरूको भाले जुदाइ हुने गरेको थियो ।
तर २०७६ चैत्र ११ गते सरकारले देशव्यापी लकडाउन जारी गर्दै सिनेमा हल सञ्चालनमा रोक लगाएसँगै सिने क्षेत्रले चर्को मार खेप्नु परेको छ । २०७७ को फाल्गुन मसान्ततिर सङ्क्रमणको जोखिम केही हदसम्म न्यूनीकरण भएसँगै आवश्यक स्वास्थ्य सर्तकताका साथ हलहरू सञ्चालनमा आएका थिए । तर महिना दिन पनि नबित्दै सङ्क्रमण दर पुनः बढ्न थालेपछि सरकारी निर्देशनबमोजिम बन्द भएका मल्टिप्लेक्स र अन्य सिनेमा हलहरू हालसम्म सञ्चालनमा आउन सकेका छैनन् ।
‘हलमा फिल्म नभएर बन्द गर्नुपर्ने अवस्था अन्त्य गर्नका लागि पनि दसैछेकबाट सिनेमा हल खोल्ने तयारीमा छौँ’, अध्यक्ष प्रधानले भने, ‘कोभिडका कारण सिनेमा हल सञ्चालक सर्वाधिक प्रभावित बनेको छन् । उनीहरूलाई उकास्नका लागि भएपनि सिनेमा हल खोल्ने निधो गरेका हौँ ।’ त्यसबाहेक अनलाइन प्लाटफर्मका कारण पनि सिने क्षेत्र प्रभावित बनेको उनको भनाइ छ ।
पछिल्लो केही समययता कोरोना महामारी र एमेजोन प्राइम भिडियो, नेटफ्लिक्स, आइफ्लिक्स, हटस्टार, जी फाइभ, नेट टिभी जस्ता अनलाइन प्लाटफर्मका कारण करोडौँको लगानीसहित सञ्चालनमा आएका मल्टिप्लेक्सहरू आर्थिक सङ्कटमा पर्दै गएका छन् ।
हल सञ्चालक भन्छन् : फिल्म भए दसैँमा नत्र तिहारमा हल खोल्छौँ
यता, चलचित्र सङ्घ प्रदेश १ का अध्यक्ष चैतन्य बराल फिल्म भएको खण्डमा मात्र आफूहरू असोजको दोस्रो साताबाट सिनेमा हल खोल्न तयार रहेको बताए । सरकारी स्वास्थ्य सुरक्षाको मापदण्ड अपनाएर सिनेमा हल खोल्न तयार रहेपनि निर्माताहरूले दर्शक नआउने डरका कारण फिल्म रिलिज गर्न आनाकानी गरिरहेको उल्लेख गर्दै बरालले भने, ‘हामी त तयार छौँ तर केही निर्माताहरू डराएको अवस्था छ । यसैले फिल्म पाएको खण्डमा हामी दसैँमा नै खोल्छौँ अन्यथा तिहारबाट भने जसरी पनि हामी हल खोल्छौँ ।’ तिहारबाट भने बलिउड फिल्मलाई लक्षित गरेर भएपनि हल खोल्ने उनको भनाइ छ ।
उनका अनुसार अहिले प्रदेश १ मा हाल ३१ वटा हलहरू बन्द अवस्थामा छन् । भिडभाडरहित वातावरण बनाएर हल चलाउनु सञ्चालकको सामाजिक दायित्व पनि भएको बताउँदै उनले बन्द अवस्थामा पनि ठुला, साना, सिङ्गल र मल्टिप्लेक्स गरेर एक हल बराबर औसतमा ४० हजारदेखि ७५ हजारभन्दा बढीसम्म मासिक खर्च भइरहेको बताए ।
दसैँ लक्षित चार फिल्म
चलचित्र सङ्घ हल खोलेर सिनेमा चलाउन तयार रहँदा पनि नेपाली फिल्म निर्माताहरू आफ्नो फिल्म रिलिज गर्न डराइरहेका छन् । केही निर्माताहरूले भने दसैँको समयमा फिल्म रिलिज गर्ने निर्णय लिएका छन् । तीमध्ये एक हो फिल्म ‘हिजो आजको कुरा’ । १२ वैशाख २०७७ लाई प्रदर्शन मिति तय गरिएको यो फिल्मलाई दसैँ वा त्यसपछि रिलिज गर्न चलचित्र सङ्घ फिल्मका निर्मातासँग छलफलमा छ ।
वितरक र हल व्यवसायीहरूबाट सहयोग मिलेको खण्डमा फिल्म रिलिज गर्न आफूहरू तयार रहेको फिल्मका निर्देशक साकार पन्त बताउँछन् । यस्तै, सविन श्रेष्ठ अभिनित फिल्म ‘धन्दागिरी’ पनि दसैँमा रिलिज हुने भएको छ । फिल्मको ट्रेलर सार्वजनिक गर्दै निर्माण टिमले असोज २५ गते (फूलपातीको अघिल्लो दिन) लाई प्रदर्शन मिति फाइनल गरेका हुन् ।
नरेन्द्र भट्टराईको कथा र निर्देशन रहेको फिल्ममा दिनेश खड्का एसोसियट निर्माता र कुमारप्रसाद ओझा कार्यकारी निर्माताको रूपमा छन् । कवि भक्त क्षेत्री र फुर्वा दोर्जे तामाङ फिल्मका निर्माता हुन् । फिल्ममा अभिनेता सविन श्रेष्ठ र अभिनेत्री छुल्ठिम गुरुङको मुख्य भूमिका रहेको छ ।
यता, चलचित्र सङ्घ दसैँमा ‘म यस्तो गीत गाउँछु २’ र तिहारमा ‘चपली हाइट ३’ रिलिज गर्ने तयारीमा छ । विदेशी फिल्मसँग नजुधाउने गरी महिनामा दुईवटा मात्रै नेपाली फिल्म रिलिज गर्ने भन्दै यतिबेला चलचित्र सङ्घले विभिन्न फिल्मका निर्मातासँग छलफल गरिरहेको छ ।
केही हदसम्म लगानी सुरक्षित हुने ‘एमजी’ मिलेको खण्डमा दसैँंमा ‘म यस्तो गीत गाउँछु २’ रिलिज हुनसक्ने बताइएको छ । दसैँमा सिनेमा हलको माहोल हेरेर÷बुझेर मात्र ‘चपली हाइट ३’ तिहारमा रिलिज गर्ने दाउमा फिल्मका निर्माता रहेको बुझिएको छ ।
