गत भदौ २१ गते बिहान ५:२० बजेतिर सङ्खुवासभाको मादी नगरपालिका–१ खोलागाउँका वर्ष ९० को बौद्धबहादुर कार्कीकी पत्नी ८४ वर्षीया पार्वता भन्ने पार्वती कार्की, छोरा ५५ वर्षीय तेजकुमार कार्की, बुहारी ५४ वर्षीया कमला भन्ने मनमाया कार्की, नातिनी बुहारी ३२ वर्षीय रञ्जना कार्की, पनाति आठ वर्षीय विपिन भन्ने दिपेन कार्की र पनातिनी पाँच वर्षीया गोमा कार्की गरी एकै परिवारका ६ सदस्यहरूको शव छरपस्ट अवस्थामा फेला परेको थियो ।
टाउको तथा शरीरको विभिन्न भागहरूमा दाउराको चिर्पटतथा धारिलो हतियार प्रहार गरी हत्या भएको र उक्त घटनामा बौद्धबहादुर कार्की भने सकुसल अवस्थामा घरमै भेटिएका थिए ।
घटनामा संलग्न अभियुक्त २५ वर्षीय लोकबहादुर कार्कीलाई २७ गते पत्रकार सम्मेलनमार्फत सार्वजनिक गरिएको । घटनाको थप अनुसन्धान गर्न १ नं. प्रदेश प्रहरी प्रमुख प्रनामनि अरूणकुमार बिसीको निर्देशनमा सङ्घीय प्रहरी कार्यालयका प्रहरी उपरीक्षक भीम दाहालको कमाण्डमा जिप्रका सङ्खुवासभाको प्रहरी नायव उपरीक्षक लालध्वज सुवेदी, इलाका प्रहरी कार्याल चैनपुरका प्रहरी निरीक्षक र प्रदेश प्रहरी कार्यालयका प्रहरी निरीक्षकसहितको संयुक्त अनुसन्धान समूह निरन्तर रूपमा खटिएको थियो ।
उक्त टोलीले अनुसन्धानमा जुटेकोमा थप तथ्यहरू र घटनाको मुख्य योजनाकारसहित मादी नगरपालिका–१ उम्लिङ खोला गाउँ बस्ने चार जनालाई नियन्त्रणमा लिएको छ । पक्राउ पर्नेमा ४७ वर्षीय खड्गबहादुर कार्की, उनका छोरा २८ वर्षीय हस्तबहादुर कार्की, ४९ वर्षीय रणबहादुर कार्की र १७ वर्षीय नरेश कार्की रहेका छन् । त्यसमध्ये खड्गबहादुर मुख्य योजनाकार रहेको प्रहरीले जनाएको छ ।
यसरी भएको थियो नरसंहार
घटना योजनावद्ध ढङ्गबाट पाँच जनाको समूहले घटाएको प्रहंरीको दाबी छ । प्रहरीका अनुसार लोकबहादुर कार्कीको घरमा घटनाको अघिल्लो राति ८ बजे मुख्य योजनाकार खड्गबहादुर कार्कीसहित हस्तबहादुर कार्की, लोकबहादुर कार्की र नरेश कार्कीसमेत बसेर योजना बनाएका थिए ।
योजना अनुसार घटनाको दिन २१ गते बिहान मृतक तेजकुमार कार्की खेताला बोलाउन लोकबहादुरको घरमा आउने र सोही अवसरमा मौका छोपेर तेजकुमार र कमला कार्कीको हत्या गर्ने अन्यले थाहा पाए भने उनीहरूको पनि हत्या गर्ने साथै अनुकुल मिलेमा तेजकुमारको घरमा भएको धनमालसमेत लानेयोजना बनाएका थिए ।
घटनाको दिन मृतकको पिप्लेस्थित खेतमा अभियुक्तहरू खड्गबहादुर कार्की, हस्तबहादुर कार्की, लोकबहादुर कार्की र नरेश नरेशकार्की समेत खेताला जाने कुरा पहिला नै निश्चित भएको थियो । योजनाअनुसार मृतक तेजकुमार कार्की बिहान आउने निश्चित गर्न खड्गबहादुर कार्की बिहान ५ बजे तेजकुमार कार्कीको घरमा गई ‘लोकबहादुर अल्छि छ घरमै गएर खेताला निश्चित गर्नू’ भनेर तेजकुमार कार्कीलाई लोकबहादुर कार्कीको घरतर्फ जान अभिप्रेरित गरेका थिए ।
त्यसपछि उनी घरतर्फ फर्केका थिए । तेजकुमार लोकबहादुर कार्कीको घरतिर जाँदै गरेको देखेपछि खड्ग बहादुर र हस्तबहादुर निजको घरपछाडि चिर्पट बोकी तयारी अवस्थामा बसेका थिए । मृतक तेजकुमार कार्की बिहान ५ बजे उठेर लोकबहादुरको घर गएर उनलाई ‘अल्छि अझैसम्म उठेको छैनस्’ भन्दै कराएपछि लोक बहादुर उठेका थिए ।
लोकबहादुरको भाइ नरेश कार्की र बाबु रणबहादुर कार्कीसमेत घरमै थिए । घरबाट फर्केने क्रममा योजनाअनुसार लोकबहादुरले भाइ नरेशलाई इसारा गरी आफूले दाउराको चिर्पट र अलैची काट्ने चक्कु बोकेर पछि–पछि गइ घर पछाडिको गोगनेको रूखनजिक तेजकुमारको टाउकोमा प्रहार गरेर लडाएका थिए ।
त्यसपछि खड्गबहादुर र हस्तबहादुर दाउराको चिर्पट लिएर तेजकुमारमाथि प्रहार गरेका थिए । र, हस्तबहादुरले चक्कुले पेटमा प्रहार गरी डिलबाट लडाएर बाटोमा झारेर हत्या गरी घोप्टो पारेका थिए । घटनाको बेला मृतकले ‘लोकेले मा¥यो, मलाई नमार्’ भन्दै गरेको हारगुहार सुनेपछि ‘मेरो श्रीमानलाई नमार्’ भन्दै तेजबहादुरकी पत्नी र बुहारी पनि घटनास्थल पुगेकी थिइन् ।
त्यसपछि लोकबहादुरले कमला कार्कीलाई प्रहार गरेका थिए । कमलाको घाटीमा हस्तबहादुरले छुरा प्रहार गरेका थिए । र, बुहारी रञ्जनालाई नरेशले ठेली खोल्सामा झारेको र खडक बहादुर, लोकबहादुर र हस्तबहादुर मिलेर हत्या गरेको प्रहरीले जनाएको छ ।
प्रहरीका अनुसार मृतक रञ्जनाको लास रणबहादुर र नरेश समेतले कमलाको लास भएको स्थानसम्म पु¥याउन सहयोग गरेका थिए । उक्त घटनाको बेला मृतक नाबालकहरू दिपेन र गोमासमेत घर नजिकको बाटोमा आएको देखेर हस्तबहादुर र लोकबहादुरले बाटो छेकी मुख थुनेर लोक बहादुरले चिर्पटले हिर्काएर घाटी बटारेर हत्या गरेको प्रहरीले जनाएको छ ।
त्यसपछि पाँचै तेजबहादुरको घरतर्फ गएका थिए । पार्वती कार्की मकै नंग्याई रहेको अवस्थामा हस्त बहादुरले समाती घर पछाडिको गोठ नजिक लगेर लोकबहादुरले टाउको भित्तामा ठोक्काई घाँटी बटारी हत्या गरेको र सबै जना घटनामा प्रयोग गरेको चिर्पट र छुरी बोकेर लोकबहादुरको घरमा गई लागेको रगत पखाली छुरी घुँई बुईकलमा लुकाएका थिए । चिर्पटहरू अगेनामा डडाएको, रगत लागेको कपडाहरू समेत लुकाएका थिए ।
अनि खड्गबहादुर र उनको छोरा हस्तबहादुर आफ्नो घरतर्फ गएका थिए । फर्कने क्रममा रञ्जनाको ओप्पो मोबाइल नरेशले लिएर आइ स्विच अफ गरी घरमुनिको ओडारमा लगेर लुकाएका थिए । पछि अनुसन्धानको क्रममा प्रहरीले मोबाइल फेला पारेको थियो ।
हत्या गरेपछि पुनः खड्ग बहादुर र उनका छोरा हस्तबहादुर लोकबहादुरको घरमा गई सबै जना मिलेर कसैले सोधेमा घटनाको बारेमा कुनै पनि कुरा नसुनेको र थाहा नपाएको भनी भन्ने यदि प्रहरी आई पत्ता लगाएमा लोकबहादुरले मानसिक औषधि पनि खाने कारण निजले जिम्मा लिने भन्ने सल्लाह गरि फर्केका थिए ।
घटनामा संलग्न चारै जनालाई नियन्त्रणमा लिई अनुसन्धान भइरहेको र अनुसन्धानको क्रममा सबै अभियुक्तहरूले घटना स्वीकार गरेको र घटनामा प्रयोग भएको छुरी, कपडा र हराएको मोबाइलसमेत बरामद गरी थप अनुसन्धान भइरहेको प्रहरीले जनाएको छ ।
घटना घटनुका कारणहरू यस्तो
अभियुक्तहरूमध्ये खड्गबहादुर नियमित रूपमा रक्सी खाने र घरमा श्रीमति र परिवारका सदस्यहरूलाई कुटपिट गाली गलौज गर्ने गर्थे । तेजकुमारले ‘तँ जड्याहा किन यसो गर्छस् ? भनि गालि गर्ने र खड्गबहादुरले पनि ‘तलाई के मतलव तलाई मार्छु भन्दै झगडा गर्ने गरेका थिए ।
यस्तै, लोकबहादुरलाई ‘तँ पागल, अल्छि, केही काम गर्न सक्दैनस्’ भन्ने र नरेशलाई ‘तँ डुँडे काम नलाग्ने भइस्’ भन्ने गरेका थिए । यस्तै, रणबहादुरलाई समेत ‘तँ लठेब्रो केही गर्ने सक्दैनस्’ भन्ने गरेको प्रहरीले जनाएको छ ।
जहिले पनि हेप्ने र आफू सम्पन्न भएको फुर्ति दिने गरेको भनी मनमा इख पालेको र घटनाको दिने अभियुक्तहरूसमेत मृतकको खेतमा खेताला जानुपर्ने कारण सोही मौका छोपेर योजना बनाइ हत्या गरेको खुलेको जिल्ला प्रहरी कार्यालय सङ्खुवासभाका प्रहरी निरीक्षक शुभेश अधिकारीले जानकारी दिए ।