शेरबहादुर देउवा नेतृत्वको सरकार गठन भएको २ महिनामा महत्वपूर्ण १५ काम भएको दाबी गरिएको छ । स्वास्थ्य राज्यमन्त्री उमेश श्रेष्ठले सामाजिक सञ्जालमार्फत सरकारले गरेका महत्वपूर्ण १५ काम सार्वजनिक गरेका हुन् ।
असोज १ गते कान्तिपुर दैनिकमा बबिता शर्माको बाइलाइनमा अक्षमताको मार्गमा देउवा शीर्षकमा समाचार छापिएको थियो । कान्तिपुर दैनिकले ७ वटा बुँदालाई मुख्य बनाएर देउवाको अक्षमताको मार्गमा हिँडेको समाचार प्रकाशित गरेको थियो ।
यी हुन् कान्तिपुर प्रकाशित गरेको ७ बुँदा
१) ६६ दिनसम्म मन्त्रिपरिषद्समेत विस्तार गर्न सकेनन्, १७ मन्त्रालय अस्वाभाविक भारी
२) दुई महिनासम्म पनि बजेटबारे धारणा बनाउन नसक्दा इतिहासमै पहिलोपटक देश आर्थिक ‘सट डाउन’ मा
३) प्रधानमन्त्री सिंहदरबार जाँदैनन्, फाइल बोकेर बालुवाटार दौडादौडमा सचिव, कतिपयले भेट पाउँदैनन्
४) सर्वोच्चको ऐतिहासिक फैसलाबाट पुनःस्थापित संसद्को गत अधिवेशन अचानक अन्त गराए, फेरि बोलाएको संसद्लाई द्वन्द्वबाट निकाल्न सकेनन्
५) १५ अध्यादेश निष्क्रिय, कोभिड अस्पताल, खोप खरिद, तेजाब तथा यौन हिंसाका पीडकलाई सख्त कारबाही गर्ने र पीडितलाई राहत दिने अध्यादेश पनि निष्क्रिय
६) तुइन खुस्काएर नेपाली युवालाई महाकालीमा खसाइएको र अनुमतिबिना नेपाली आकाशमा हेलिकोप्टर उडाइएको बारे भारतसँग पत्राचार गर्नसमेत आनाकानी
७) एमसीसीका बारेमा स्पष्ट हुने नाममा नेपालको संविधान र सार्वभौमिकताबारे शंका व्यक्त गर्दै पत्राचार, तर सम्झौताबारे गठबन्धनभित्रै साझा धारणा बनाउन असफल
उक्त समाचारलाई काउन्टर दिन र आम जनमानसमा आफूले काम गरेको देखाउनको लागि प्रधानमन्त्री शेर बहादुर देउवाको सचिवालयले २ महिनाको अवधिमा गरेका १५ कामको सूची सार्वजनिक गरेको हो ।
स्वास्थ्य राज्यमन्त्री श्रेष्ठले सार्वजनिक गरेका १५ काममध्ये कान्तिपुरले उल्लेख गरेका कुनैपनि विषयमा प्रवेश गरिएको छैन । यसमा अधिकांश काम स्वास्थ्य क्षेत्रमा रहेको उल्लेख गरिएको छ । जसमध्ये कोरोना महामारी नियन्त्रणलाई उच्च प्राथमिकतादेखि त्रिचन्द्र कलेज र घण्टाघर पुनर्निर्माणको निर्णयसम्मलाई समेटिएको छ ।
प्रमुखरुपमा विद्युत प्राधिकरणमा कुलमान घिसिङको पुनर्नियुक्ति, भूमि आयोग गठन, स्वास्थ्य सेवाका कर्मचारीको तलब वृद्धि लगायत छन्।
त्यसैगरी हालै ल्याइएको प्रतिस्थापन बजेटमा समेटिएका केही कार्यक्रमलाई पनि समावेश गरिएको छ ।
यी हुन् देउवा सरकारका १५ काम
१) कोरोना महामारी नियन्त्रणलाई उच्च प्राथमिकता
२) योग्य र अनुभवी व्यक्तिलाई सही जिम्मेवारी दिने नीति अनुरूप विद्युत प्राधिकरणमा कुलमान घिसिङ र योजना आयोगमा विश्व पौडेलको नियुक्ति
३) खोप केन्द्रको चुस्त व्यवस्थापन र एकैदिन तीनलाखलाई खोप दिन सफलता
४) १८ वर्षमुनिका बालबालिकालाई दिइने ४० लाख मात्रा मोर्डना खोपको टुंगो
५) बाढी, पहिरो र डुबान पीडितको युद्धस्तरमा उदार तथा राहत र पुनस्थापना
६) कोरोनाबाट प्रभावित अर्थतन्त्र पुनरुत्थानका लागि विशेष प्याकेज
७) कर्मचारी, शिक्षक, सेना, प्रहरी स्वास्थ्य सेवाका कर्मचारीको तलब वृद्धि
८) क्यान्सर, मृगौला र स्पाइनल इन्जुरीका बिरामीलाई मासिक ५ हजार भत्ता
९) अति विपन्न गरिब घर परिवारलाई दश हजार रुपैयाका दरले राहात
१०) राजधानीका दश ठाउँमा सस्तोमा भोजनको व्यवस्था
११) विद्यार्थी लक्षित ‘पदै कमाउँदै र महिला लक्षित महिला पहिला’ कार्यक्रम
१२) भूमि आयोगको गठन
१३) एमसीसीमा राष्ट्रिय सहमति निर्माणको पहल
१४) प्रमुख प्रतिपक्षी दललाई विश्वासमा लिन अनौपचारिक छलफल र संवाद
१५) त्रिचन्द्र कलेज र घण्टाघर पुनर्निर्माणको निर्णय
