नेत्रविक्रम चन्द ‘विप्लव’ नेतृत्वको नेकपाका नेता खड्गबहादुर विश्वकर्मा ‘प्रकाण्ड’ ले अमेरिकी परियोजना मिलेनियम च्यालेन्ज कर्पोरेसन (एमसीसी) अघि बढाएमा देशमा आगो लाग्ने चेतावनी दिएका छन्। एमसीसीविरुद्ध जारी आन्दोलनबारे शनिवार काठमाडौंमा आयोजित पत्रकार सम्मेलनमा नेता विश्वकर्माले यस्तो चेतावनी दिएका हुन्।
‘अहिले राष्ट्रियतामाथि ठूलो हमला भइरहेको छ। तीन चार वर्षअघि सम्पन्न गर्ने उद्देश्यले अमेरिकी शासक वर्गले यो परियोजना अघि बढाएको थियो,’ उनले भने, ‘शेरबहादुर देउवा नेतृत्वको सरकारको पालामा गरिएको सम्झौता हो यो। जसमा माओवादी अध्यक्ष पुष्पकमल दाहाल ‘प्रचण्ड’ पनि साझेदार थिए।’ जनताकै विरोधका कारण अहिलेसम्म एमसीसी पास हुनबाट रोकिएको उनले बताए।
‘हाम्रो विरोधले चाहेर पनि शासकले यसलाई पास गर्न सकेका थिएनन्। ओलीले पनि हाउसमा टेबुल गर्न सकेनन्,’ उनले भने, ‘अहिले पनि एमसीसीविरुद्ध संघर्षको कार्यक्रम चलिरहेको छ। यही २८ गते बृहत् कार्यक्रम गर्छौं।’ एमसीसी पास गर्ने मूर्खता गरिए शेरबहादुर देउवा नेतृत्वको सरकारविरुद्ध प्रतिरोध गरिने चेतावनी पनि उनले दिए।
‘यो सरकारले एमसीसी पास गर्ने मूर्खता नगर्नु, छोटो समयको सरकार हो यो। ओलीले कोसिस त गरेका थिए तर पनि सकेनन्,’ उनले भने, ‘एमसीसी जस्तो राष्ट्रघाती परियोजना संसदबाट पास गराएर इतिहासमा अक्षम्य अपराध नगर्नू।’ उनले प्रधानमन्त्री देउवाले जनताको कुरा सुनेर एमसीसीलाई संसदमा लैजान नहुने पनि उनले बताए।
‘देउवाले हाउसमा एमसीसी लाने कुरा फिर्ता लिनुपर्छ। नेपाली जनताको विरोधलाई सुन्नुपर्छ,’ उनले भने, ‘यदि एमसीसी अघि बढाएमा कडा आन्दोलन गर्छौं। संसदीय भ्रष्ट तत्वलाई हामीले किन छुट दिने ? उनीहरुविरुद्ध प्रतिरोध गर्छौं।’ नेता विश्वकर्माले यदि एमसीसी पास भएमा देशमा आगो लाग्ने दाबी गरे।
‘यदि एमसीसी जबरजस्ती पास गरिन्छ भने यो देश जल्छ। आगो लाग्छ, आन्दोलनको आगो लागेका बेला के हुन्छ, शासकहरूले हेक्का राखुन्,’ उनले भने, ‘अहिले प्रचण्ड जी पनि त्यही गठबन्धनमा छन्। त्यसैले उनले पनि यसबारे बेलैमा नसोचे पछुताउनेछन्।
