नेकपा (एमाले) जुम्लाका ६१ जना जिल्ला सदस्यमध्ये अध्यक्षसहित ५८ जना नेकपा (एकीकृत समाजवादी)मा प्रवेश गरेका छन् ।
आज (शनिबार) पत्रकार सम्मेलन गरी उनीहरूले माधवकुमार नेतृत्वको दल एकीकृत समाजवादीमा लागेको घोषणा गरेका हुन् ।
एमालेका जुम्ला अध्यक्ष तीर्थ बुढा, उपाध्यक्ष नन्दराम रोकाया, सचिव आदीप्रसाद न्यौपाने, उपसचिव राजबहादुर खत्रीसहित जिल्ला सदस्यहरूले एकीकृत समाजवादी रोजेका हुन् ।
एमाले जुम्लाका उपाध्यक्ष नन्दराम रोकायाको अध्यक्षतामा गरिएको पत्रकार सम्मेलनमा सहभागीले आफूहरु एमाले छाडेर एकीकृत समाजवादीमा लागेको घोषणा गरिएको छ ।
उनीहरूले जारी गरेको विज्ञप्तीमा पूर्वप्रधानमन्त्री तथा एमालेका अध्यक्ष के.पी शर्मा ओली आडम्बर, अहंकार, दम्भ र घमण्डले आफुसहित सिंगो पार्टीको गतिशिल जीवन नै ध्वस्त बनाउने अभियानमा जुटेको आरोप लगाइएको छ ।