कोरोना महामारीका बेला विराटनगरमा सम्पन्न छैटौँ संस्करणको गोल्ड कपमा ८ लाखभन्दा बढी मुनाफा भएको आयोजक समितिले जानकारी दिएको छ ।
बुधवार पत्रकार सम्मेलन गरेर आयोजक समिति विराट गोल्ड कप ट्रस्टले गोल्ड कपबाट आठ लाख दुई हजार तीन सय ६२ रुपैयाँ मुनाफा भएको जनाएको हो ।
गत चैत २६ गतेबाट वैशाख ४ गतेसम्म सञ्चालन भएको रात्रिकालीन विराट गोल्ड कपमा एक करोड ४७ लाख ७४ हजार ५ सय ९४ रुपैयाँ कुल आम्दानी भएको आयोजक समितिका संयोजक मनोजविक्रम साहले जानकारी दिए ।
विराट गोल्डकप फुटबल प्रतियोगितामा आयोजकलाई ८ लाख २ हजार ३ सय ६२ रुपैयाँ नाफा भएको छ । प्रतियोगितामा भएको आम्दानी र खर्च सार्वजनिक गर्दै आयोजक समितिले प्रतियोगिता सञ्चालनका लागि विराटनगर महानगरपालिकाले १२ लाख, सामाजिक विकास मन्त्रालयले १५ लाख, राष्ट्रिय खेलकुद परिषदबाट ४ लाख रुपैयाँ आर्थिक सहयोग आएको जानकारी दिएको थियो ।
मुख्य प्रायोजकबाट २० लाख, प्रायोजकहरूबाट १० लाख, सह प्रायोजकहरूबाट ५० हजार प्राप्त भएको बताउँदै संयोजक साहले टिकट बिक्रीबाट ५९ लाख ७६ हजार १ सय आम्दानी भएको बताए ।
यस्तै, प्रतियोगितामा एक करोड ३९ लाख ७२ हजार २ सय ३१ रुपैयाँ खर्च भएको आयोजक समितिले जनाएको छ । प्रतियोगिताको पुरस्कार राशितर्फ ३५ लाख ११ हजार, खेलाडी टोलीतर्फ ३७ लाख ९१ हजार, मिडिया तथा प्रचारप्रसारतर्फ १२ लाख ६४ हजार, फ्लेक्स होर्डिङ बोर्डतर्फ १० लाख ६३ हजार, रङ्गशाला मर्मत र सरसफाइ खर्चमा ६ लाख ९१ हजार, मैदान मर्मततर्फ पाँच लाख ४३ हजार आठ सय रुपैयाँ खर्च भएको थियो ।
विराटनगरको सहिद रंगशालमा फ्लडलाइट जडान गरेर खेलाइएको उक्त प्रतियोगिताको विजेता सशस्त्र प्रहरी बल काठमाडौँ बनेको थियो भने उपविजेता पन्जाब पुलिस जलन्धर भारत बनेको थियो । एपिएफले भारतको पञ्जाब पुलिस क्लबलाई १–० ले पराजित गर्दै उपाधि जितेको थियो ।
विराट गोल्ड कप ट्रस्टका अध्यक्ष सन्तोष बानियाँले आगामी दिनमा पनि विराट गोल्डकपलाई निरन्तरता दिने बताए । एउटा गौरवको रूपमा रहेको गोल्डकपको आफ्ना शाख जोगाउनको लागि पनि प्रतियोगिता गर्नै पर्ने बाध्यता रहेको बताए ।
