स्पेनिस क्लब बार्सिलोनामा १० नम्बरको जर्सी लिजेन्ड खेलाडीहरूले लगाएका छन् । लियोलन मेस्सी र रोनाल्डिन्होभन्दा अगाडि रिभाल्डो, रोमारियो, डिएगो म्याराडोनाजस्ता लिजेन्ड खेलाडीले उक्त जर्सी लगाएका थिए । फुटबल ‘भगवान’ मानिने म्याराडोनाले १९८० को दशकमा १० नम्बरको जर्सी लगाएका थिए ।
क्लब स्थापनाको सुरुवाततिर बार्सिलोनामा अर्जेन्टिनी मिडफिल्डर फ्लोरेन्सियोले १० नम्बरको जर्सी लगाएका थिए । उनी सबैभन्दा सुरुमा बार्सिलोनामा १० नम्बरको जर्सी लगाउने खेलाडीसमेत हुन् । त्यसपछि हङ्गेरियन फरवार्ड लास्ज्लो कुबेलाले लगाएका थिए । यस्तै, १९६० को दशकमा रामोन भिल्लाभेर्डे, फर्नान्ड गोयभार्ट्स, हुगो सोटिल र जुआन म्यानुअल एसेन्सीले उक्त नम्बरको जर्सी भिरेका थिए ।
त्यसपछि पालो आयो, म्याराडोनाको । म्याराडोना तत्कालीन सबैभन्दा महँगो खेलाडी बन्दै बार्सिलोनामा अनुबन्ध भएका थिए । सन् १९८२ मा विश्वकप जितेपछि उनी पाँच मिलियन युरोमा बार्सिलोना आएका थिए । त्यसपछि ह्रिस्तो स्टोइचकोभ हुँदै मेस्सीसम्मले बार्सिलोनामा १० नम्बरको लगाए ।
सन् १९९५ देखि एक वर्षसम्म एन्जल कुएलरले १० नम्बरको जर्सी लगाएका थिए भने त्यसपछि जियोभानीले १९९६ देखि १९९७ सम्म, जारी लिटमेननले १९९९ देखि २००० सम्म, रिभाल्डोले २००० देखि २००२ सम्म, जुआन रोमन रिक्युल्मीले २००२ देखि २००३ सम्म, रोनान्डिन्होले २००३ देखि २००८ सम्म र मेस्सीले २००८ देखि २०२१ सम्म १० नम्बरको जर्सी लगाए । बार्सिलोनामा लामो समय उक्त जर्सी लगाएका खेलाडी मेस्सी नै हुन् । उनले १३ वर्ष १० नम्बरको जर्सी लगाएका थिए ।
बार्सिलोनामा अनुबन्ध हुँदा उनले १० नम्बरको जर्सी लगाएका थिए । त्यसपछि १९ नम्बर हुँदै १० नम्बरको जर्सी उनले लगाए । अब भने, बार्सिलोनामा १० नम्बरको जर्सी अलपत्र हुने लगभग निश्चित नै छ । केही खेलाडीले भने बार्सिलोनामा १० नम्बरको जर्सी रिटायटर्ड गर्न माग गरेका छन् । अर्जेन्टिनी स्ट्राइकर मेस्सीले बार्सिलोना छोड्ने पक्का भइसकेपछि नै ब्राजिलियन लिजेन्ड रोनाल्डिन्होले १० नम्बरको जर्सीलाई रिटायर्ड गर्न माग गरेका थिए ।
रोनाल्डिन्होले सन् २००३ देखि २००८ सम्म पाँच वर्ष क्याप नोउबाट खेलेका थिए । फ्रान्सेली क्लब पेरिस सेन्ट जर्मेन (पिएसजी)मा दुई वर्ष बिताएर स्पेन पुगेका उनले पाँचै वर्ष १० नम्बरको जर्सी लगाए । त्यसपछि उक्त जर्सी मेस्सीले लगाएका थिए । व्यवसायिक करिअरको अधिकांश समय ब्यतित गरेर बार्सिलोनाबाट बिदा भएका मेस्सीले आफ्नो ‘आइकोनिक’ जर्सी पनि छोडे ।
बार्सिलोना छोडेको दुई दिनपछि नै उनी लिग वान क्लब पिएसजीमा अनुबन्धित भइसकेका छन् । ला लिगाको आर्थिक सीमिततासम्बन्धी प्रावधानका कारण बार्सिलोनाले मेस्सीका लागि उपयुक्त रकम तिर्न नसक्दा मुक्त भएका ३४ वर्षीय मेस्सीले पिएसजीसँग दुई वर्षे अनुबन्धन सम्झौता गरिसकेका छन् ।
अनुबन्धनमा मेस्सीले चाहे तेस्रो वर्षसमेत पिएसजीका लागि खेल्न सक्ने प्रावधान राखिएको छ । उनले दुई जना सबैभन्दा महँगा खेलाडी नेयमार र कायल एम्बाप्पेसँगै पिएसजीको आक्रमण सम्हाल्नेछन् । मेस्सीले आगामी शनिबार स्ट्रासवर्गमा पिएसजीका लागि ‘डेब्यु’ खेल खेल्नेछन् । पिएसजीमा मेस्सीले ३० नम्बर जर्सी लगाउनेछन् । तर बार्सिलोनामा भने मेस्सीले लगाउँदै आएको १० नम्बरे जर्सी अलपत्र बनेको छ ।
नयाँ सिजनमा उक्त जर्सी लगाउने खेलाडी बार्सिलोनाले बिरलै पाउला । १० नम्बरे जर्सी लगाउने खेलाडी भट्टाएपनि सो जर्सीलाई न्याय गर्नसक्ने खेलाडी भेट्न बार्सिलोनाले नसक्ला । तथापि, यसका बारेमा अहिले नै निर्क्यौल गर्न सकिँदैन । बार्सिलोनाले जोन ग्याम्पर ट्रफीको फाइनल खेलमा १० नम्बरको जर्सी कुनैपनि खेलाडीले लगाएका थिएनन्, जुन खेलमा बार्सिलोनाले इटालियन क्लब युभेन्टसमाथि ३–० गोलको सहज जित दर्ता गर्दै उपाधि जितेको थियो । र, यसैलाई आधार मानेर भन्दा आगामी सिजन पनि यो जर्सी बार्सिलोनाले अरू खेलाडीलाई दिँदैन ।
रोनाल्डिन्होले भनेजस्तै बार्सिलोनाको १० नम्बरे जर्सीलाई रिटायर्ड पनि गर्न सम्भव छैन । किनकि, स्पेनिस ला लिगामा जर्सी नम्बरलाई रिटायर्ड गर्ने परम्परा छैन । जसरी एनबिए, इटालियन सिरी ‘ए’ र इङ्ग्लिस प्रिमियर लिगमा छ । ती लिगमा पनि जर्सी नम्बर रिटायर्ड गरेको केस दुर्लभ नै छ । चेल्सीले जियानफ्रान्को जोलाको २५ नम्बरको जर्सी रिटायर्ड गरेको थियो ।