अर्जेन्टिनी स्ट्राइकर लियोनल मेस्सीलाई स्वागत गर्न फ्रान्सेली क्लब पेरिस सेन्ट जर्मेन (पिएसजी) का समर्थकहरू सोमबार स्टेडियममा भेला भएका थिए । पिएसजीको मैदान पर्स डेस प्रिन्सेस स्टेडियमा हजारौँ समर्थक मेस्सीको स्वागतमा जुटेका थिए ।
सोमबार नै उनी पेरिस आउने पक्का भएको भन्दै पिएसजीका फ्यान एयरपोर्ट तथास्टेडियमा जम्मा भएका थिए । लिग वान क्लब पिएसजीले सर्वाधिक ६ पटकका बालोन डी‘ओर मेस्सीलाई हिजो नै पेरिस बोलाएर आज अनुबन्ध गरी सार्वजनिक गर्ने तयारीमा थियो ।
तर मेस्सी भने फ्रान्समा नभइ स्पेनस्थित आफ्नै घरमा पूर्वसहकर्मी लुइस स्वारेजसँग घरमै थिए । इटालियन खेल पत्रकार फाब्रिजियो रोमानोले मेस्सी पेरिस वा कतै नगएर घरमै परिवारसँग थिए ।
उनका अनुसार मेस्सीले पेरिस प्रस्थान गर्ने योजनासमेत बनेको छैन । यता, पिएसजीले पनि मङ्गलबार अर्थात आज मेस्सीलाई सार्वजनिक गर्ने तालिका निकालेको छैन । पिएसजी मेस्सी आउनेमा विश्वस्त छ । पिएसजीले मेस्सीलाई गरेको प्रस्तावका केही बुँदाहरूमाथि मेस्सी पक्षले छलफल गरिरहेको छ ।
पत्रकार रोमानोले मेस्सीका वकिलहरू र बुबा जर्ज मेस्सीले पिएसजीको आधिकारिक प्रस्तावनाका विषयमा काम गरिरहेको उनले जनाएका छन् । पिएसजीले आइतबार नै मेस्सी अनुबन्धका लागि अफर गरेको जनाउँदै उनले मेस्सी पेरिस प्रस्थान गरेमा सहमति भएको मान्न सकिने जनाएका छन् ।
पिएसजीले वार्षिक करिब ४० मिलियन डलर दिनेगरी मेस्सीलाई प्रस्ताव गरेको जनाइएको छ । एक वर्ष सम्झौता थप्न सकिने विकल्पसहित पिएसजीले मेस्सीलाई अफर गरेको बताइएको छ । यता, मेस्सी पनि पिएसजी जान सहमत भइसकेको बताइन्छ । आइतबार बार्सिलोनाबाट बिदा हुँदैगर्दा मेस्सीले पिएसजी जाने सम्भावना रहेको उल्लेख गरेका थिए ।
मेस्सी अनुबन्धनको औपचारिक घोषणा गर्न पिएसजीले पेरिसको आइफल टावरसमेत बुक गरिसकिएको बताइन्छ ।
