विश्व फुटबलका एक महान् हस्ती लियोनल मेस्सी स्पेनिस क्लब बार्सिलोनाबाट बिदा भएका छन् । मेस्सी आइतबार एक कार्यक्रमका बीच बार्सिलोनाबाट बिदा भएका हुन् । बिदाइ कार्यक्रममा सर्वाधिक ६ पटकका बालोन डी‘ओर विजेता मेस्सी भावुक बनेका थिए ।
बार्सिलोनासँगको २१ वर्षे यात्रा टुङ्ग्याउँदै गर्दा उनी पत्रकार सम्मेलनमै रोएका थिए । उनले भावुक मुद्रामा भने, ‘म यहाँ मेरो पूरा जीवन बसेँ, १३ वर्षको उमेरदेखि । २१ वर्षपछि मैले मेरी पत्नी र तीन साना सन्तानसहित बार्सिलोना छोड्दैछु । म यहाँ फेरि फर्किदिनँ भनेर बाचा गर्न सक्दिनँ किनकि यो मेरो घर हो । फेरि पनि फर्किन सक्छु ।’
१३ वर्षको किशोर उमेरमा ला मेसिया एकेड्मीमा आवद्ध भएका उनले त्यहाँ आवद्ध भएको चार वर्षपछि १६ वर्षको उमेरमा सिनियर टोलीबाट खेल्न थालेका थिए । मेस्सी र बार्सिलोनाबीच गत ३० जुनबाट सम्झौता सकिएको थियो । त्यसपछि दुवै पक्ष सम्झौता नवीकरण गर्न असफल भएका थिए । सम्झौता नवीकरण हुन नसकेपछि मेस्सी त्यहाँबाट बिदा भएका हुन् ।
