घरेलु लिगमा सर्वाधिक सफल क्लब पेरिस सेन्ट जर्मेन (पिएसजी)ले नयाँ सिजनको फ्रान्सेली लिग वानमा पहिलो जित निकालेको छ । शनिबार राति अवे मैदानमा पिएसजीले ट्रोयसमाथि २–१ गोलको जित निकालेको हो ।
ट्रोयसको मैदानमा पिएसजीले घरेलु टोलीको सुरुवाती अग्रता उल्टाउँदै जित निकालेको हो । खेलको नवौँ मिनेटमा ट्रोयसका औअलिद हजामले गोल गर्दै घरेलु टिमलाई अग्रता दिलाएका थिए ।
खेलको १९औँ मिनेटमा अच्राफ हाकिमीले गोल गर्दै पिएसजीलाई बराबरीमा फर्काए । हाकिमीले लिग वानमा पहिलो गोल गरेका हुन् ।
खेलको २१औँ मिनेटमा इकार्डीले गोल गर्दै पिएसजीलाई अग्रता दिलाए । त्यसपछि बाँकी समय गोल नहुँदा पिएसजीले तीन अङ्क जोड्यो । पिएसजी हाल लिग वानको शीर्ष स्थानमा छ ।