१३औँ संस्करणको दक्षिण एसियाली फुटबल (साफ) च्याम्पियनसिपको तयारीमा रहेका नेपाल र भारतले दुई मैत्रीपूर्ण खेल खेल्ने पक्का भएको छ । शुक्रबार अखिल नेपाल फुटबल सङ्घ (एन्फा)ले भारतीय फुटबल टिमसँग दुई टा मैत्रीपूर्ण खेल खेल्ने पक्का भएको जनाएको हो ।
ंएन्फाका अनुसार भदौ १७ र २० गते हुने दुवै खेल त्रिपुरेश्वरस्थित दशरथ रङ्गशालामा हुनेछ । एन्फाका अनुसार एन्फा र भारत फुटबल महासङ्घबीच औपचारिक रूपमा मैत्रीपूर्ण फुटबलका लागि सहमति भएको हो ।
हालसम्म दुवै टोलीले एक अर्काविरुद्ध १९ खेल खेलेका छन्, जसमा भारतले १३ खेलमा जित निकालेको छ । नेपालले भारतलाई दुई पटक हराएको छ । अरू चार खेल भने बराबरीमा सकिएको छ ।
सन् २०१३ मा काठमाडौँमा सम्पन्न साफ च्याम्पियनसिपमा नेपालले २–१ ले भारतलाई हराएको थियो । त्यसपछिको पाँच भेटमा नेपालले एक बराबरी खेल्दा अन्य खेल गुमाएको छ । सन् २०१८ को फिफा विश्वकप छनोट खेल्ने क्रममा सन् २०१५ मा नेपालले भारतको सामना दशरथ रङ्गशालामा गरेको थियो ।
नेपाल फिफा वरीयताको १७१औँ स्थानमा छ भने भारत १०५औँ स्थानमा छ ।
