पोर्चुगलका भेट्रान डिफेन्डर पेपे विवादित खेलाडी पनि हुन् । बेला–बेलामा खराब ट्याकल गरेर विपक्षी खेलाडीलाई मरणाशन्नसमेत बनाउने पेपे उमेरले ३८ वर्ष पुगिसकेका छन् तर अझै देशका लागि र व्यवसायिक खेल खेल्न छोडेका छैनन् । उनी टोलीका खम्बा हुन् भने विपक्षी खेलाडीका लागि खतरनाक पर्खाल ।
पर्खाल यसकारण पनि कि उनले विपक्षी खेलाडीमाथि ज्यानै दाउमा थापेर ट्याकल गर्छन् । गोल हुनबाट हरसम्भव बचाउँछन् । बरु रेड कार्ड खान पछि पर्दैनन् तर प्रतिद्वन्द्वी खेलाडीलाई घाइतेसम्म बनाउँछन् । रोमाका विङ्गर हेनरिक मिखितार्यन उनीबाट पीडित पछिल्ला खेलाडी हुन् ।
२९ जुलाईमा भएको प्रि–सिजनको खेलमा पेपे सम्मिलित टिम पोर्टो र जोसे मौरिन्हो नेतृत्वको टिम एएस रोमाले खेलिरहेका थिए । १–१ गोलको बराबरीमा सकिएको उक्त खेलमा पेपेले मिखितार्यनमाथि खराब ट्याकल गरेका थिए । तर उनले रातो वा पहेँलो कुनै पनि कार्ड पाएनन् । बरु मिखितार्यनले नै उल्टै पहेँलो कार्ड पाए, पेपेमाथिको प्रतिक्रियाका लागि ।
रियल मड्रिडमा छँदा पेपे टोलीका ‘पावर हाउस’ मानिन्थे । सन् २००९ मा राष्ट्रिय टोलीका सहकर्मी क्रिस्टियानो रोनाल्डो पनि स्पेन आएपछि पोर्चुगलका दुई खेलाडीले रियल तताए । रोनाल्डो फरवार्ड लाइनका पावरहाउस मानिन्थे भने पेपे डिफेन्डरमा उत्कृष्ट थिए ।
सन् २००९ अप्रिलमा बर्नाबेउमा भएको गेटाफेसँगको फाइनल खेलमा उनले ‘झेली’ व्यवहार प्रस्तुत गरेका थिए । गेटाफेका जाभी कास्कुरोले पेपेलाई छक्याउँदै बल अगाडि बढाइरहेको अवस्थामा उनले खराब ट्याकल गर्छन् । बल इकर क्यासिल्लाससमक्ष पु¥याउनै लाग्दा उनलाई पेपेले लडाउँछन् । त्यसपछि लडेका कास्कुरोलाई भकुर्नथाल्छन् । उनको रिस त्यतिमै सीमित हुँदैन । रेफ्रीले रेड कार्ड दिँदै पेपेलाई मैदानबाहिर पठाउँदा पनि उनी गेटाफेका खेलाडीविरुद्ध चिच्याइरहन्छन् ।
ठूला खेलमा पनि उस्तै रिस
राष्ट्रिय टोलीबाट होस् या क्लबबाट, पेपेमा विपक्षी खेलाडीप्रतिको रिस उस्तै रह्यो । यतिसम्म कि विश्वकपको खेलमा पनि उस्तै । सन् २०१४ को विश्वकपमा जर्मनीविरुद्ध मैदान उत्रिएका पेपेले विपक्षी टोलीका थोमस मुलरलाई भकुरेका थिए ।
खेलको ३७औँ मिनेटमा पास आएको बल जसोतसो क्लियर गरेका उनले मुलरलाई लडाएका थिए । रेफ्रीले सिटी फुकेपछि मैदानमा बसेका मुलरलाई पेपेले भकुरे र रातो कार्ड खाँदै मैदानबाहिर निस्केका थिए ।
पुराना प्रतिद्वन्द्वी
पेपेले १० वर्ष रियल मड्रिडबाट खेले । सन् २००७ देखि २०१७ सम्म ला लिगा खेल्दा पेपेले आफ्नो मुख्य निशानामा बार्सिलोनाका लियोनल मेस्सीलाई बनाएका थिए । पेपेले धेरै पटक उनीमाथि फउल गरेका थिए । उनले एक अन्तर्वार्तामा सधैँ मेस्सीमाथि नै खराब ट्याकल गर्न मन लाग्नेसमेत सुनाएका थिए ।
एक खेलका क्रममा पेपे र मेस्सीबीच भनाभनसमेत परेको थियो । मैदानमा मेस्सीविरुद्ध खराब ट्याकल गरेपछि पेपेले भनेका थिए, ‘मविरुद्ध खेल्दा तिमी कोही पनि होइनौँ ।’ जवाफमा मेस्सीले भनेका थिए, ‘तिमीले केबारे भनिरहेका छौ ? म सधैँ तिमीविरुद्ध गोल गरिरहन्छु ।’
सन् २०१२ को जनवरीमा पनि उनले मेस्सीमाथि मैदानमै रिस पोखेका थिए । रियलका खेलाडीको ट्याकलबाट लडेका मेस्सीलाई पेपेले कुममा घुँडाले ठोक्काउँदै हात किचिदिएका थिए । त्यसपछि उनले पहेँलो कार्ड पाएका थिए ।
विशेषगरीः मेस्सी र पेपेबीचको लडाइँ ‘एल क्लासिको’ देखिन्थ्यो । त्यहाँ उनीहरूबीच सामान्यदेखि ठूला लडाइँमा मुछिन्थे । प्रायः सधैँ पेपेले मेस्सीलाई ट्याकलको निशाना बनाउथे ।