ब्युँताइएको यूथ फोर्स भ्याली कमाण्ड घोषणा सभामालाई सम्बोधन गर्दै नेकपा (एमाले(का महासचिव ईश्वर पोखरेलले युथफोर्सलाई अब भ्रष्टाचारविरुद्ध अभियान चलाउन निर्देशन दिएका छन् ।
शनिवार घोषणा सभामा पार्टी अध्यक्ष केपी शर्मा ओलीको ठाउँमा प्रमुख अतिथि बनेर मन्तव्य राखेका उनले युथफोर्सलाई भ्रष्टाचारविरुद्ध अभियान दह्रोसँग चलाउन निर्देशन दिएका हुन् ।
उनले ब्युँताइएको यूथ फोर्सलाई निर्देशन दिए, ‘परिवर्तित सन्दर्भमा जनतासँग जोडिने, जनताले नचाहेको काम नगर्ने, जनतालाई उत्पादनसँग जोड्ने, स्वरोजगारसँग अभियान चलाउने काम तपाईँहरूले गर्नुपर्छ र, भ्रष्टाचार विरुद्ध अभियान चलाउनुपर्छ ।’
साथै, हालसालैलाई जनताले राम्रो नठान्ने काम नगर्न पनि उनको निर्देशन छ । युथफोर्स फरक परिवेशमा गठन भएको र परिस्थितिअनुसार काम गर्नुपर्ने पनि उनले बताए।
युथफोर्स आतङ्कको स्रोत नभई आतङ्क सिर्जना गर्नेलाई तह लगाउने सङ्गठन भएको उनको भनाइ छ । उनले भने, ‘युथ फोर्स आतङ्कको स्रोत होइन, कोही आतङ्क सिर्जना गर्न चाहन्छन् भने त्यसलाई ठेगान लगाउने सङ्गठन हो । हामी कानुनी शासनलाई मान्छौँ । कानुन हातमा लिँदैनौँ ।’
युथ फोर्स एमालेको रक्षा गर्ने एउटा खम्बाका रूपमा उभिन पनि पोखरेलले आह्वान गरेका छन् भने युवासंघ नेपाललाई अभिभावका रूपमा मानेर अघि बढ्नुपर्ने उनको निर्देशन दिए।
एमाले यूथ फोर्सको ‘भ्याली कमाण्ड’ घोषणा
नेकपा एमालेको केपी ओली निकट यूथ फोर्सको भ्याली कमाण्ड घोषणा भएको छ । शनिवार राजधानीमा आयोजित एक कार्यक्रममा एमाले महासचिव ईश्वर पोखरेलले यूथ फोर्सको भ्याली कमाण्ड घोषणा गरेका हुन् ।
एमाले अध्यक्ष केपी शर्मा ओली कार्यक्रममा उपस्थित हुने भनिए पनि उनको सट्टामा महासचिव पोखरेल कार्यक्रममा उपस्थित भएका हुन् ।
त्यसअघि युथफोर्सले हजारौँको सङ्ख्यामा मोटरसाइकल र्यालीसहित वृहत् मार्च पास गरेको थियो । मार्च पास माइतीघरबाट नयाँ बानेश्वर पुगी बानेश्वरबाट पुनः बबरमहल हुँदै कार्की व्याङ्क्वेटमा पुर्याई अन्त्य भएको थियो ।