गैर आवासीय नेपाली सङ्घ (एन आर एन), राष्ट्रिय परिषद् दक्षिण कोरियाको सचिव पदमा हरि प्रसाद भट्टराईले उम्मेदवारी दिएका छन्।
भट्टराईले आगामी जुलाई २४ र २५ तारिकमा हुने एन आर एन राष्ट्रिय समन्वय परिषद् दक्षिण कोरियाको सचिव पदमा उम्मेदवारी घोषणा गरी चुनावी मैदानमा रहेको जानकारी दिएका हुन् ।
सन् २०१२ मा कोरिया प्रवेश गरी सङ्घर्ष गर्दै आफ्नो अध्ययनलाई निरन्तरता दिएका भट्टराईले अध्ययन पश्चात् हाल जनबुक बैक सुवनको नेपाली डेस्क प्रमुखको रूपमा काम गरिरहेका छन्।
व्यवहारिक समस्यामा पर्दै आइरहेका नेपालीहरूलाई बेकिङ सेवा, भाषा अनुवाद, तथा आर्थिक सहयोग गर्दै आएका भट्टराईले आफ्नो व्यक्तिगत अनुभव र क्षमतालाई संस्थागत रूपमा प्रयोग गर्ने उपयुक्त थलोको रूपमा एन. आर. एन. ए ठानी राष्ट्रिय परिषद् दक्षिण कोरियाको सचिव पदमा उम्मेदवारी दिएको बताए।
मिजासिलो स्वभावका भट्टराई कोरियामा रहेका आम नेपाली समुदाय लाई भोट दिन विनम्र अनुरोध गर्दै “थोरै बोलौँ धेरै गरौँ, सबैले मान्ने NRNA बनाऔँ ” भन्ने मूल नाराका साथ आएको बताउँछन्।
उनलाई धेरै बलियो उम्मेदवारको रूपमा हेरिनुको साथै भारी मतले विजयी हुने आङ्कलन समेत गरिएको छ। भट्टराईले नेपालमा रहँदा पनि विभिन्न सामाजिक सङ्घ संस्था तथा मानव अधिकारवादी संस्थामा रही स्वयंसेवक भूमिका निर्वाह गरिसकेका छन् ।
५ ओटा मूल एजेन्डा बोकेर आएका उनले अहिलेको NRNA कोरियाले विद्यार्थी र श्रमिकलाई उपेक्षा गरेको बताउँदै आफू विद्यार्थी र श्रमिकको पक्षमा सदैव हुने साथै NRNA कोरियालाई विश्वकै उत्कृष्ट एनआरएनए बनाउन लागि लागिपर्ने समेत बताए।
आफू कार्यरत बैकसँग समन्वय गरी नेपालीहरूको लागि सेल्टर(महिलाको लागि छुट्टै)को व्यवस्था गर्न पहल गर्ने, कोरियामा रहेका नेपालीहरूमाझ नेपालमा लगानीमैत्री कार्यक्रमको लागि पहल गर्ने, विभिन्न कोरियन सङ्घ संस्थाहरूसँग समन्वय गरी नेपालीहरूको संस्कृति झल्किने बहु सांस्कृतिक(हिन्दु तथा बुद्धिस्ट) मन्दिर स्थापनाको लागि पहल गर्ने, नेपालीहरूको लागि आपतकालिन राहत कोषको लागि पहल गर्ने र एनआरएनए कल सेन्टर तथा नेपाली स्कुललाई अझ परिष्कृत गर्दै निरन्तरताको लागि पहल गर्ने आफ्नो मूल एजेन्डा भएको बताएका छन् ।
अब युवाहरु अगाडि बढेर एनआरएनए कोरियालाई अझ व्यवस्थित बनाउनुपर्ने कुरामा उनले जोड दिए ।
