नेकपा (एमाले) को दोस्रो तहका नेताहरूले पार्टी एकतालाई जोगाउन कार्यदलले गरेको १० बुँदे सहमतिलाई अगाडि बढाउने निष्कर्ष निकालेको छ ।
अध्यक्ष केपी शर्मा ओली र वरिष्ठ नेता माधवुकमार नेपाल पक्षका नेताहरुले असार २७ मा १० बुँदे सहमति गरे पनि सहमति कार्यान्वयन नहुँदै अध्यक्ष ओली र नेता नेपालबीच अन्तरविरोध बढेको छ ।
शनिबार एमाले अध्यक्ष केपी शर्मा ओली र वरिष्ठ नेता माधवकुमार नेपाल पक्षका दोस्रो तहका नेताबीच भएको छलफलमा सहभागी नेताहरुले पार्टी एकता जोगाउन १० बुँदे सहमति सहयोगी बन्ने निष्कर्ष निकालेका हुन् ।
छलफलमा कार्यदलमा रहेका ओली पक्षका नेताहरू सुवास नेम्वाङ, विष्णु पौडेल, प्रदीप ज्ञवाली, शंकर पोखरेल र विष्णु रिमाल तथा खनाल–नेपाल पक्षका भीम रावल, घनश्याम भुसाल, गोकर्ण विष्ट, सुरेन्द्र पाण्डे र रघुजी पन्तको सहभागीता रहेको थियो । शनिवारको छलफलमा एमाले सचिव भीम आचार्य पनि सहभागी भएका छन् ।
पार्टीमा फेरि अन्तरविरोध बढेको भन्दै नेकपा एमालेका दोस्रो तहका नेताहरु छलफलमा जुटेका हुन् । शनिबार सिंहदरबारमा भएको अनौपचारिक छलफलमा गत असार २७ गते भएको १० बुँदे सहमति कार्यान्वयन र पार्टी एकता जोगाउने विषयमा छलफल भएको एमाले सचिव गोकर्ण विष्टले जानकारी दिए ।
एमाले एकताका लागि दुवै पक्ष सम्मिलित कार्यदलले १० बुँदे सहमति गरेको थियो । तर, २८ असारको सर्वोच्च अदालतको फैसलाले प्रतिनिधि सभा पुनःस्थापनासँगै ओली प्रधानमन्त्रीबाट हटेपछि पार्टीभित्र दूरी बढेको छ । अध्यक्ष ओलीले एकपक्षीय रुपमा स्थायी कमिटी बैठक बोलाएको भन्दै शुक्रबारको बैठक पनि खनाल–नेपाल पक्षले बहिस्कार गरेको थियो । पार्टीभित्र विवाद बढ्दै गएपछि एमाले दोस्रो तहका नेताहरू छलफलमा जुटेका हुन् ।
शुक्रबार अध्यक्ष ओलीले राखेको स्थायी कमिटी र संसदीय दलको बैठकमा नेपाल पक्षका नेताहरु गएनन् । स्थायी कमिटी बैठक स्थलमा पुगेर नेपाल पक्षका कार्यदल सदस्यहरुले बैठक रोक्ने र १०बुँदे सहमति कार्यान्वयन गर्न आग्रह गरेका थिए । तर अध्यक्ष ओलीले बैठक रोकेनन् । आफ्नो पक्षका नेताहरु मात्र रहेको स्थायी कमिटीबाट १० बुँदे सहमति अनुमोदन गर्दै कार्यदल खारेज गर्ने निर्णय गराएका थिए ।
