सुदूरपश्चिम प्रदेशको अस्थायी राजधानी धनगढी उपमहानगरपालिका भित्रका ३ वटा स्थानमा धनगढी उपमहानगरपालिकाले मोटरसाइकल पार्किङ स्थल निर्माण गरेको थियो । सडक किनारमा जथाभाबी मोटरसाइकल राख्न थालेपछि दुर्घटनाको जोखिम बढेको थियो । दुर्घटना रोक्न र व्यवस्थित बनाउन तयार गरिएका पार्किङ स्थलहरू अहिले सुनसान बन्न थालेका छन् ।
एलचोक, जनस्वास्थ्य कार्यालय र जिल्ला प्रशासन कार्यालय नजिक बनाएका पार्किङ स्थल भन्दा बढी सेती प्रादेशिक अस्पताल क्षेत्र अघि मोटरसाइकलको चाप बढी हुने गरेको छ ।‘पार्किङको व्यवस्थापन नहुँदा दुर्घटनाको जोखिम बढेको छ’ स्थानीय सरोज रानाले भने ‘भएको पार्किङ स्थल पनि प्रयोग नहुँनु विडम्बना हो ।
‘अस्पताल अघिको सडक साँघुरो छ त्यसैमाथि जथाभाबी पार्किङ गर्न थालेपछि दुर्घटनाको जोखिम बढाएको छ । प्रयोग विहीन जस्तै भएको पार्किङ स्थललाई बढी प्रयोगमा ल्याउनु पर्ने त्यस क्षेत्रका व्यापारीहरूको पनि माग छ ।‘अस्पताल अगाडीको अव्यवस्थित पार्किङले आवतजावतमा समेत समस्या भइरहेको छ’ स्थानीय भक्तराज चौधरीले भने ‘यसको तत्काल व्यवस्थापन गर्न आवश्यक छ ।
’पार्किङस्थल भए पनि त्यहाँ सर्वसाधारणले पार्किङ नगरिरहेको अवस्था छ । अव्यवस्थित ढङ्गले यत्रतत्र मोटरसाइकल लगायतका सवारी साधन राख्दा दुर्घटनाको जोखिम बढेको सर्वसाधारणको मात्रै होइन ट्राफिक प्रहरीको पनि ठहर छ ।‘सडक साँघुरो छ त्योसँगै त्यहाँ अटो रिक्सा बढी चल्छन् अनि पार्किङ पनि जथाभाबी छ’ जिल्ला ट्राफिक प्रहरी कार्यालय कैलालीका प्रमुख प्रहरी निरीक्षक बिरेन्द्र बोहराले भने ‘अटो रिक्सा लगायत अन्य सवारी साधनहरू पार्किङको थप व्यवस्थापन हुन्छ ।
‘उपमहानगरपालिकाले पनि ट्राफिक प्रहरीसँग छलफल गरेर पार्किङको व्यवस्थापन गर्न जनाएको छ । विगतमा पार्किङको व्यवस्थापन गरेको बारे धेरैलाई जानकारी नरहेको धनगढी उपमहानगरपालिका प्रवक्ता एवम् वडा नम्बर १ का अध्यक्ष सन्तोष मुडभरीले बताए । उनले भने, ‘हामीले तयार गरेको पार्किङ स्थलबारे धेरैलाई थाहा नभएर समस्या भएको हो, ‘अब प्रहरीसँग समन्वय गरेर कसरी व्यवस्थापन गर्न सकिन्छ भन्ने विषयमा छलफल गरिरहेका छौँ ।’
