काठमाडौँ उपत्यकामा बारअनुसार समय निर्धारण गरेर पसल खोल्ने प्रशासनको नियम अव्यवहारिक भएको राष्ट्रिय व्यापार सङ्घले जनाएको ।
राष्ट्रिय व्यापार सङ्घका महासचिव वैकुण्ठ दाहालले आज एक विज्ञप्ति जारी गर्दै काठमाडौँ उपत्यकामा यही असार ८ गतेदेखि समय सीमा निर्धारण गरेर वैकल्पिक दिनहरूमा सञ्चालन गर्ने भनिएको व्यवस्था व्यवसायीहरूको लागि अव्यवहारिक र सहज नरहेको बताएका छन् ।
सङ्घले यस व्यवस्थालाई अविलम्ब सच्चाएर हप्ताको सबै दिन व्यवसाय गर्ने वातावरण मिलाइदिन माग गरेको छ । साथै सङ्घले सम्पूर्ण व्यवसायीहरूलाई यथाशीघ्र खोपको व्यवस्था गर्न सरकारसँग माग गरेको छ ।
जिल्ला प्रशासन कार्यालयले सोमबार सूचना जारी गर्दै कुन बार के पसल खुल्ने सूची सार्वजनिक गरेको छ ।
यस्तो छ सूची ।
क. औषधी तथा स्वास्थ्य सामग्री सम्बन्धी पसल जुनसुकै समयमा निर्बाध रूपमा सञ्चालन गर्ने ।
ख. खाद्यान्न, दूध तथा दुग्ध जन्य पदार्थ, फलफूल, तरकारी, माछा मासु, पूजा सामग्री बिक्री वितरण गर्ने पसलहरू, खेलकुद सामग्री पसल, डिपार्टमेन्टल स्टोर (ग्रोसरी मात्र), स्टेशनरी/पुस्तक पसलहरू बिहान ११ बजेसम्म सञ्चालन गर्न पाउने।
ग. डिपार्टमेन्टल स्टोर (ग्रोसरी बाहेक), सपिङ मल र खेलकुद सामग्री पसल, कपडा, जुत्ता, फेन्सी, कस्मेटिक, साडी, गिफ्ट आइटम, टेलरिङ्ग सोमबार, बुधवार र शुक्रवार बिहान ११ बजे देखि अपराह्न ४ बजेसम्म सञ्चालन गर्ने।
घ. सुन पसल, भाँडा, भान्सा जन्य, विद्युतीय घरायसी सामग्री, अटो मोबाइल शोरुम, अटो मोबाइल पार्टस् पसल, इलेकट्रोनिक पसल (मोबाइल तथा कम्प्युटर पसल) आइतबार, मङ्गलवार र बिहीबार बिहान ११ बजे देखि अपराह्न ४ बजे सम्म सञ्चालन गर्ने ।
ङ. निर्माणजन्य सामग्रीको पसल (हार्डवेयर पसल, बिजुलीका सामान, स्यानिटरी पसल, टायल, मार्बल, फर्निचर, कटिङ्ग) दैनिक बिहान ११ बजे देखि अपराह्न ६ बजेसम्म सञ्चालन गर्न पाउने । ठुलो परिमाणको ढुवानी राति मात्र गर्ने ।
च. पसल तथा व्यवसाय सञ्चालन गर्दा कम्तीमा २ मिटरको भौतिक दूरी कायम गर्ने, अनिवार्य रूपमा स्यानिटाइजर व्यवस्था गर्ने र स्वास्थ्य मापदण्ड पालना गर्नुपर्ने । यदि तोके बमोजिम स्वास्थ्य मापदण्ड परिपालना नगरेको अनुगमनको क्रममा भेटिएमा पसल तथा व्यवसाय तत्काल बन्द गर्ने ।
छ. अत्यावश्यक वस्तुहरूको अनलाइन तथा टेक अवे सेवा होम डेलिभरी प्रयोजनका लागि काठमाडौँ उपत्यका भित्र मात्र साँझ ७:०० बजेसम्म सञ्चालन गर्ने ।
