गण्डकी प्रदेश सभाका विपक्षी गठबन्धनका ३१ सांसदलाई सांग्रिला होटलमा राखिएको छ । विपक्षी गठबन्धनको तर्फबाट नेपाली कांग्रेसका संसदीय दलका नेता कृष्णचन्द्र नेपालीसहित मुख्यमन्त्री बनाउने पक्षमा हस्ताक्षर गरेका सबै सांसदलाई होटलमा राखिएको छ ।
भोली नयाँ सरकार गठनको प्रक्रिया आरम्भ भएपछि मात्रै सांसदहरुलाई संसदमा प्रवेश गराउने तयारी रहेको बुझिएको छ । यो भन्दा अगाडि पनि सांसद हराउने डर भएकोले आजैबाट उनीहरुलाई होटलमा राखिएको बुझिएको छ ।
प्रमुख प्रतिपक्षी नेपाली कांग्रेसका १५, नेकपा(माओवादी केन्द्र)का ११(सभामुख बाहेक) तथा जनता समाजवादी पार्टी नेपाल र राष्ट्रिय जनमोर्चाका दुईदुई सदस्यले विश्वासको मतका विपक्षमा मतदान गरे । जनमोर्चाका सदस्य कृष्ण थापा तटस्थ बसेपछि गण्डकीका मुख्य मन्त्री पृथ्वी सुब्बा गुरुङ पदमुक्त्त भएका थिए ।
मुख्यमन्त्री गुरुङ प्रदेशसभाबाट विश्वासको मत प्राप्त गर्न असमर्थ भएपछि अब संविधानको धारा १६८ उपधारा ५ अनुसार प्रदेश प्रमुखले नयाँ सरकार गठनका लागि आह्वान गर्नुपर्ने हुन्छ । संविधानको सो धारामा विश्वासको मत पाउन सक्ने दावी पेश गरेका प्रदेशसभा सदस्यलाई प्रदेश प्रमुखले मुख्यमन्त्री नियुक्त गर्ने संवैधानिक प्रावधान छ ।
प्रदेशसभाका कुनै पनि सदस्यले बहुमत जुटाउन नसके संविधानको धारा १६८ (७) अनुसार प्रदेशसभा विघटन भई मध्यावधि निर्वाचनको मिति घोषणा हुने संवैधानिक व्यवस्था छ ।
