नेकपा एमालेका प्राय सबै कमिटीमा संस्थापन पक्षको दबदबा छ । अल्पमतमा रहेको खनाल–नेपाल समूहका नेता कार्यकर्तामाथि ओली नेतृत्वको संस्थापन पक्षले स्पष्टीकरण र कारबाहीको डन्डा चलाइरहेको छ । केन्द्रदेखि प्रदेशसम्म नेपाल समूहका धेरै नेता कार्यकर्ता कारबाहीमा परेका छन् । कर्णालीमा फ्लोर क्रस गरेर माओवादी केन्द्रका मुख्यमन्त्रीलाई विश्वासको मत दिने चार सांसदको सांसद पद नै गयो । फ्लोर क्रस गरेको भन्दै पार्टी र संसदीय दलले कारबाही गरेपछि उनीहरूको पद गयो । केन्द्रमा कतिपय नेताहरू साधारण सदस्य नै नरहने गरी पार्टीबाट निकालिए ।
मङ्गलवार सुदूरपश्चिममा भने फरक दृश्य देख्न पाइयो । कर्णालीमा जतै सुदूरपश्चिमका मुख्यमन्त्रीले पनि विश्वासको मत लिए । अवस्था कर्णाली र सुदूरपश्चिममा पनि उस्तै थियो । माओवादीका मुख्यमन्त्री भए पनि सांसद एमालेका धेरै छन् । काँग्रेसले विश्वासको मत नदिँदा पनि मुख्यमन्त्रीले बहुमत बढी मत पाए । मतदानमा प्रदेश सभाका ५२ सदस्यमध्ये २७ मत आवश्यक भएकोमा मुख्यमन्त्री भट्टले ३० जनाको मत प्राप्त गरे । एमालेको खनाल–नेपाल पक्षका १७ र प्रदेश सभामा रहेका माओवादी केन्द्रका १३ सांसदले उनलाई विश्वासको मत दिए । एमालेकै ओली पक्षका सात र जनता समाजवादी पार्टीका दुईसहित नौ जना सांसदले मुख्यमन्त्री भट्टको विपक्षमा मतदान गरे। मतदानमा काँग्रेसका १२ जना सांसद तटस्थ बसे।
सुदूरपश्चिममा ओली पक्ष कमजोर हुनुमा भीम रावलको प्रभाव बलियो हुनु हो । भीम रावललाई प्रदेश इन्चार्जबाट हटाएर माओवादी आएर एमाले बनेका लेखराज भट्टलाई इन्चार्ज बनाइएपछि सुदूरपश्चिममा ओली पक्ष कमजोर बन्दै गएको हो ।
कर्णालीमा नेपाल पक्षका सांसदले फ्लोर क्रस गरेर मुख्यमन्त्रीलाई विश्वासको मत दिएका थिए । तर, सुदूरपश्चिममा उल्टो देखियो । नेपाल पक्षकाले मुख्यमन्त्रीलाई साथ त दिए तर, फ्लोर क्रस गर्नु परेन । बरु ओली पक्षका सात सांसदले फ्लोर क्रस गरेर विपक्षमा मतदान गरे । एमालेको आन्तरिक विवादले सङ्कटमा परेका सुदूरपश्चिम प्रदेशका मुख्यमन्त्री त्रिलोचन भट्टले कम्तीमा एक वर्षका लागि पद सुरक्षित गरेका छन् ।
संसद् सुरु हुनुअघि बसेको एमाले सुदूरपश्चिम प्रदेश संसदीय दलको बैठकले विश्वासको पक्षमा मत दिनका लागि आफ्ना सांसदलाई ह्विप जारी गरेको थियो । त्यस्तै, एमालेको सुदूरपश्चिम प्रदेश कमिटीले मुख्यमन्त्रीको विपक्षमा मतदान गर्न आफ्ना सांसदहरूलाई सोमबार नै निर्देशन दिएको थियो । प्रदेश अध्यक्ष कर्ण थापा र सचिव राजेन्द्रसिंह रावलले सांसदहरूलाई पत्र पठाउँदै विश्वासको मतको विपक्षमा मतदान गर्न निर्देशन दिएका थिए । मतदान सकिएसँगै संसद्मा बहुमत र दलको नेतासमेत रहेको खनाल–नेपाल समूहले ह्विप उल्लङ्घन गर्ने ओली खेमाका सात जनालाई २४ घन्टे स्पष्टीकरण पठाइसकेको छ । २४ घण्टाभित्र स्पष्टीकरण बुझाउन निर्देशन दिएका छन् । स्पष्टीकरण नदिए वा चित्तबुझ्दो जवाफ नआए संसदीय दलको विधानअनुसार कारबाही गरिने स्पष्टीकरण पत्रमा उल्लेख छ ।
तर, ओली पक्षले भने नेपाल पक्षका सांसदले फ्लोर क्रस गरेको आरोप लगाइरहेको छ । पार्टीको संस्थापन पक्षमा ओली रहेकाले फ्लोर क्रस गर्ने नेपाल समूहका सांसदलाई कारबाही गर्ने चेतावनी प्रदेश कमिटीले दिएको छ ।
पूर्व माओवादीलाई काखी च्याप्दा सधैँ असफल
सुदूरपश्चिम प्रदेश मात्रै होला जहाँ ओलीभन्दा नेपाल पक्ष बलियो छ । ओलीले पटक पटक अनेक प्रयन्त गरे पनि उनी सफल हुन सकेका छैनन् । १० जेठमा नेकपा एमालेको स्थायी कमिटी बैठकले माओवादी नेतृत्वको सुदूरपश्चिम प्रदेश सरकारलाई दिएको समर्थन फिर्ता लिने निर्णय गरेको थियो । तर, प्रदेश संसदीय दलको बैठक बैठकले ओलीलाई चुनौती दिँदै समर्थन फिर्ता नलिने निर्णय गर्यो । ओली विफल भए । ओलीले मन्त्रिपरिषद्बाट फिर्ता हुन निर्देशन दिए र तर, त्यो पनि असफल भयो ।
सुदूरपश्चिम प्रदेशमा आफ्नो पक्षमा समीकरण बनाउन ओली पक्ष पटक–पटक असफल रह्यो। सुदूरपश्चिममा ओली पक्ष कमजोर हुनुमा भीम रावलको प्रभाव बलियो हुनु हो । भीम रावललाई प्रदेश इन्चार्जबाट हटाएर माओवादी आएर एमाले बनेका लेखराज भट्टलाई इन्चार्ज बनाइएपछि सुदूरपश्चिममा ओली पक्ष कमजोर बन्दै गएको हो । माओवादीमा सुदूरपश्चिममा नम्बर १ नेता भट्टले माओवादीमा समेत प्रभाव जमाउन सकेनन् । उनी माओवादी छोडेर एमाले आउँदा एक जना मात्रै सांसद मात्रै उनीसँगै एमालेमा आए । माओवादी छोड्दा आफूसँग प्रदेशसभा सदस्य लैजान नसकेका लेखराजले एमालेभित्र पनि राम्रो प्रभाव बनाउन सकेका छैनन् । जस कारण ओली सुदूरमा जति प्रयास गर्दा पनि विफल भइरहेका छन् ।
