१ नम्बर प्रदेशसभा सदस्य बिन्दिया कार्कीको छोरा रोविन कार्कीले चलाएको कारको ठक्करबाट बिहीबार बेलुका एक जनाको मृत्यु भयो । मृत्यु हुनेमा भारत कटिहार घर भएका ३५ वर्षीय मुकेश शर्मा थिए ।
उनी विराटनगर–४ मा रहेको न्यू एभरेस्ट फर्निचरमा काम गर्ने मजदुर हुन् । घटनामा उनकै साथी कटहरी गाउँपालिका–२ का २७ वर्षीय रामकुमार राजवंशी गम्भीर घाइते बने । उनको विराटनगरस्थित नोबेल मेडिकल शिक्षण अस्पतालमा उपचार भइरहेको छ । यस्तो, ज्यानै जानेगरी भएको दुर्घटनामा कार चलाउने सांसदका छोरा रोविनसँग सवारी चालक अनुमतिपत्र (लाइसेन्स) नै नभएको पाइएको छ ।
विराटनगरमा कारको ठक्करबाट एक पैदलयात्रीको मृत्यु, अर्का एक जना गम्भीर घाइते
बिहीबार साँझ साढे ७ बजे विराटनगर–४ एयरपोर्ट मोडमा उनले चलाएको कार अनियन्त्रित भई दुर्घटना भएको थियो । बेलुका ७ः३५ बजे होटल एसियाटिक अगाडि उक्त होन्डा सिटी कारले मजदुरद्वयलाई ठक्कर दिएको थियो ।
एयरपोर्ट मोडभित्र रहेको एक होटलमा मादक पदार्थ सेवन गरेर, दुई युवतीका साथ कार्की कार लिएर निस्किएको स्रोतले बताएको छ । त्यसबाहेक कारमा बियरका बोतलसमेत रहेको प्रत्यक्षदर्शी बताउँछन् । दुर्घटनामा परेको कार क्षतिग्रस्त भएको छ ।
पक्राउ गर्न प्रहरीको आनाकानी
प्रदेश ३–०१–००२ च २१३९ नम्बरको उक्त कार प्रदेशसभा सदस्य बिन्दिया कार्कीको भएको पुष्टि भइसकेको छ । कारको ठक्कर दिएपछि अवस्था गम्भीर देखेरे त्यहाँबाट फरार भएका कार्कीलाई प्रहरीले अझै पक्राउ गरेको छैन । प्रहरीले उनलाई पक्राउ गर्न आनाकानी गरिरहेको दाबी ।
जिल्ला प्रहरी कार्यालयले पत्रकारहरूलाई समेत यस विषयमा रिपोर्टिङ नगरिदिन आग्रह गरिएको दाबी गरिएको छ । स्रोतका अनुसार पीडित परिवारलाई केही रकम दिने प्रलोभन सुरु भएको र घटना गुपचुप गराउन पनि आर्थिक स्रोतको परिचालन भएको बुझिएको छ ।
सांसदका छोराले चलाएको कार दुर्घटना, एक पैदलयात्रीको मृत्यु, अर्का एक जना घाइते
यस्तै, प्रहरीले मेडिकल परीक्षण गर्दा प्रमाणित नहोस् भन्नेगरी चालकलाई ढिलो गरी पक्राउ गर्ने योजना अनुरुप छलछाम गरेको स्थानीयको आरोप छ । कार्कीलाई बचाउन प्रदेश सरकारका मन्त्रीदेखि काङ्ग्रेसका माथिल्लो तहका नेताहरूले नै प्रहरीलाई दबाब दिइरहेको स्रोतको दाबी छ ।
कार्कीले यसअघि पनि थुप्रै दुर्घटना गराएको स्रोतको दाबी छ । यद्यपि पहुँचमा भएको कारण उनी छुट्दै आएका थिए ।
भुल सुधार : यस अगाडि होटेलको नाम अन्यथा भएकोमा सच्याइएको छ ।