१ नम्बर प्रदेशसभा सदस्य बिन्दिया कार्कीको छोरा रोविन कार्कीले चलाएको कारको ठक्करबाट एक जनाको मृत्यु भएको छ ।
बिहीबार साँझ साढे ७ बजे विराटनगर– एयरपोर्ट मोडमा दुर्घटना भएको थियो । कारले दुई पैदलयात्रीलाई ठक्कर दिँदा एक पैदलयात्रीको मृत्यु भएको हो भने अर्का एक जना घाइते भएका छन् ।
प्रदेश ३–०१–००२ च २१३९ नम्बरको उक्त कार प्रदेशसभा सदस्य बिन्दिया कार्कीको हो । प्रत्यक्षदर्शीका अनुसार कारको ठक्कर दिएपछि अवस्था गम्भीर देखेरे चालक कार्की त्यहाँबाट फरार भएका छन् ।
कार्कीले यसअघि पनि थुप्रै दुर्घटना गराएको स्रोतको दाबी छ । यद्यपि पहुँचमा भएको कारण उनी छुट्दै आएका थिए । दुर्घटनामा परेको कार क्षतिग्रस्त भएको छ । एयरपोर्ट मोडभित्र रहेको ह्यास ट्याक होटलमा खाजा पानी खाएर कार्की कार लिएर निस्केका निस्किएका थिए ।
बेलुका ७ः३५ बजे होटल एसियाटिक अगाडि उक्त होन्डा सिटी कारले दुई जना पैदलयात्रीलाई ठक्कर दिएको थियो । जसमा विराटनगर–४ मा रहेको न्यू एभरेस्ट फर्निचरमा काम गर्ने भारत कटिहार घर भएका ३५ वर्षीय मुकेश शर्माको मृत्युु भएको हो ।
यस्तै, सोही स्थानमा काम गर्ने कटहरी गाउँपालिका–२ का २७ वर्षीय रामकुमार राजवंशी घाइते भएका छन् । गम्भीर घाइते उनको विराटनगरस्थित नोबेल मेडिकल शिक्षण अस्पतालमा उपचार भइरहेको छ ।
