प्रतिनिधि सभा विघटनको सिफारिस गर्न बालुबाटारमा मध्यरातमा बैठक चलिरहेको छ ।
राष्ट्रपति विद्यादेवी भण्डारीले नेपालको संविधानको धारा ७६ को उपधारा ५ बमोजिम प्रतिनिधि सभामा विश्वासको मत प्राप्त गर्न सक्ने आधार पेश गरेका प्रधानमन्त्री केपी शर्मा ओली र विपक्षी गठबन्धनबाट नेपाली काँग्रेसका सभापति शेर बहादुर देउवाले गरेको दावी गरेअनुसार बहुमत नपुगेको भन्दै विज्ञप्ती जारी गरेपछि संसद् विघटन को सिफारिस गर्न मध्यरातमा बालुबाटारमा मन्त्रिपरिषद् बैठक बसिरहेको छ ।
सरकार गठनका लागि राष्ट्रपतिबाट दुबै पक्षको दाबी खारेज भएपछि प्रधानमन्त्री केपी शर्मा ओलीले मन्त्रिपरिषदको आकस्मिक बैठक बोलाएका हुन् । बालुवाटार स्रोतका अनुसार मन्त्रीहरुलाई राति ११ पछि मात्रै खबर गरिएको थियो । बैठक राष्ट्रपति कार्यालयबाट विज्ञप्ति जारी गरिएको केही मिनेटमै सुरु भएको हो ।
बालुवाटारमा केही मन्त्रीहरु त्यहीँ थिए । तर, केही भने पुग्ने क्रम जारी रहेको बुझिएको छ । आजको मन्त्रिपरिषद बैठकले प्रतिनिधिसभा विघटन गर्ने र चुनावको नयाँ मिति घोषणा गर्ने उच्च स्रोतको दावी छ ।
यसअघि बेलुकी ७ बजे बोलाइएको मन्त्रिपरिषद् बैठक राष्ट्रपतिको निर्णय कुरेर पछाडि सारिएको थियो। त्यसपछि राति ११ बजे मन्त्रीहरुलाई बालुवाटार आउन भनिएको थियो।
संविधानअनुसार धारा ७६ को उपधारा ५ अनुसार प्रधानमन्त्री नियुक्ति हुन नसकेको अवस्थामा प्रधानमन्त्रीको सिफारिसमा राष्ट्रपतिले प्रतिनिधि सभा विघटन गरी छ महिनाभित्र अर्को प्रतिनिधि सभाको निर्वाचन सम्पन्न हुने गरी निर्वाचनको मिति तोक्नुपर्ने हुन्छ ।