‘न इन्डियनले काम गर्यो न चाइनिजले । यो त हामी दुवै जनाको रिपोर्टले भन्छ ।’ यो भक्तपुरका एक कोरोना संक्रमितको एक बाणी हो । भक्तपुरका एक दम्पत्ति (नाम-ठेगाना नखुलाउने शर्तमा) लाई शुक्रबार कोरोना भाइरस संक्रमण पुष्टि भयो ।
उनीहरू दुवैलाई पहिलो पटक कोभिड देखिएको हो । यसअघि पहिलो लहरमा भने उनीहरू जसोतसो कोभिड संक्रमित हुनबाट जोगिएका थिए । निजामति कर्मचारी भएका कारण कार्यालय जावत–जावत गर्ने क्रममा ४१ वर्षीय श्रीमती कोरोना संक्रमित बनिन् । ५१ वर्षीय श्रीमान भने रिटायर्ड कर्मचारी हुन् ।
कोरोनासँग मिल्दाजुल्दो लक्षण देखिएपछि उनीहरूले बिहीबार आरटी पिसिआर परीक्षण गराएका थिए । शुक्रबार रिपोर्ट आउँदा दुवैको नतिजा पोजिटिभ आयो । कोरोना संक्रमण पुष्टि भएपछि हाल दुवै जना होम आइसोलेसनमा छन् । घरमै उपचार गराइरहेका उनीहरूले नियमित रूपमा औषधि सेवन गरिरहेका पनि छन् ।
उनीहरू दुवैले कोभिड–१९ विरुद्धको खोप लगाएका थिए । श्रीमतीले दुवै डोजको खोप लगाएकी थिइन् भने श्रीमानले पहिलो डोजको खोप मात्र लगाएका थिए । श्रीमतीले अघिल्लोपटक भारत सरकारबाट अनुदानमा प्राप्त खोप लगाएकी थिइन् । श्रीमानले भने चीन सरकारले दिएको खोपको पहिलो मात्रा लगाएका थिए ।
इन्डियन र चाइनिज खोप लगाएका उनीहरूमा कोभिड देखिएपछि भ्याक्सिनको प्रभाव कोरोनामा नपरेको भन्दै श्रीमानले गुनासो गरे, ‘न इन्डियनले काम गर्यो न चाइनिजले । यो त हामी दुवै जनाको रिपोर्टले भन्छ ।’
यता, जनस्वास्थ्यविद् डाक्टर रविन्द्र पाण्डे खोप लगाएका व्यक्तिलाई पनि जनस्वास्थ्यका मापदण्ड पालना नगरेमा संक्रमण हुने बताउँछन् । ‘जनस्वास्थ्यका मापदण्ड पालना नगरेमा खोप लगाएका व्यक्तिलाई पनि संक्रमण हुनसक्छ । उनीहरूको संक्रमण अन्य व्यक्तिलाई सर्न सक्छ । फरक यो छ कि खोप लगाएका व्यक्तिको गम्भीर हुने वा मृत्यु हुने दर नगन्य छ । प्रमाणित खोप जुनसुकै लगाएपनि गम्भीर हुनबाट बचाएको छ’, उनले भने ।
‘विभिन्न वैज्ञानिक परीक्षणबाट कोभिड र खोपको पुष्टि भएको छ’, उनले भने, ‘अनाधिकृत व्यक्तिका भ्रामक कुरा सुन्नुहुँदैन । सरकारले दिने सूचना र विज्ञका कुरा विश्वास गर्नुपर्दछ । कोरोना के हो ? भन्नको लागि अस्पतालमा छटपटाइरहेका संक्रमित हेरे स्पष्ट बुझिन्छ । खोपले काम गर्ने-नगर्ने बारे खोप लगाएका व्यक्तिको मृत्युदर हेरे थाहा हुन्छ । दोस्रो लहरको कोरोना संक्रामक देखिए पनि मृत्युदर भने कम छ ।’
